Cabanas - REGULAMENTO DE VENDA AMBULANTE E FEIRAS DO CONCELLO DE CABANAS

Artigo 1. O presente regulamento ten por obxecto regular aspectos específicos sobre o exercicio da venda ambulante e a realización de feiras e mercados no termo municipal de Cabanas.

En todo caso, o exercicio da venda ambulante haberase de someter ao establecido na Lei 13/2010, de 17 de decembro, de Comercio Interior de Galicia, Real Decreto 199/2010, de 26 de febreiro, polo que se realiza o exercicio da venda ambulante ou non sedentaria.

Para os supostos previstos no presente Regulamento de venda ambulante e feiras será de aplicación, con carácter xeral, o cumprimento da normativa vixente en canto ao Imposto de Actividades Económicas, Seguridade Social e normativa hixiénico-sanitaria e alimentaria.

Artigo 2. Enténdese por venda ambulante a venda realizada fóra dun establecemento comercial permanente, de xeito habitual, ocasional, periódico ou continuado, nos perímetros ou lugares debidamente autorizados en instalacións desmontábeis ou transportábeis, incluíndo os vehículos-tenda.

Artigo 3. No presente regulamento distínguense as seguinte modalidades de venda ambulante permitidas no Concello de Cabanas:

a) A venda ambulante en feiras e mercados organizados polo Concello de Cabanas.

b) A venda ambulante en mercados ocasionais, incluíndo aqueles xurdidos da iniciativa privada ou con motivo de festas ou acontecementos populares.

c) A venda ambulante mediante camións ou vehículos-tenda.

d) A venda en postos instalados na vía pública, fóra de acontecementos.

e) A venda directa de produtos agrícolas por parte dos seus produtores.

Artigo 4. O Concello de Cabanas organiza os seguintes feiras e mercados, nos que está permitida a venda ambulante:

a) Feira do 21.

b) Mercados temáticos de verán “Mercados de Santa Marta”.

Artigo 5. Normas específicas de participación na Feira do 21.

- A Feira do 21 ten lugar o día 21 de cada mes no Paseo Marítimo.

- A Feira do 21 admite postos de todo tipo, incluíndo, entre outros: alimentación, artesanía, roupa e complementos, artigos de segunda man, etc.

- De acordo co establecido no artigo 6.1.d) da Ordenanza reguladora da taxa por instalación de postos, barracas e outros en terreos de uso público do Concello de Cabanas, a participación na Feira do 21 implicará o pago, por cada metro cadrado ou fracción, da cantidade de 0,03 euros día, cun mínimo de 3,00 euros día.

- Para a participación na feira do 21 non é precisa unha inscrición previa, polo que tampouco haberá espazos asignados a cada posto. Porén, os vendedores deberán estar ao indicado polas autoridades e o persoal do concello, e en todo caso, o concello resérvase o dereito de restrinxir a instalación de postos en determinadas áreas para a instalación de postos específicos, así como de concentrar o lugar de instalación dos postos de acordo coas súas temáticas.

- En todo caso, os postos instalados deberán situarse sempre sobre a superficie pavimentada da beirarrúa do Paseo Marítimo, deixando libres os accesos ao piñeiral, os bancos, colectores do lixo e as papeleiras

- Os postos e cubertas deberanse soster por si mesmos, non podendo empregar mobiliario urbano (farois, bancos, papeleiras etc.), cravar piquetas, ou taladrar o chan para o seu soporte.

- A Feira do 21 rexerase de acordo aos seguintes horarios:

Horario de instalación: de 08:30 a 10:30 horas.

Horario de funcionamento: de 09:30 a 17:00 horas.

Horario de recollida: de 15:00 a 18:00 horas.

- Cada un dos postos será responsábel de deixar limpos de refugallos os espazos ocupados ao final do horario de recollida, para o que depositarán o lixo nos depósitos colocados a tal efecto polo concello. As caixas deberán ser aplanadas para aproveitar axeitadamente a capacidade dos mesmos.

- Non se permite en ningún caso a invasión da beirarrúa por parte de vehículos, agás os expresamente autorizados.

Artigo 6. Normas específicas de participación nos mercados temáticos de verán “Mercados de Santa Marta”.

Os Mercados de Santa Marta serán organizados por parte do concello en diferentes fins de semana arredor da romaría de Santa Marta, no Paseo Marítimo.

- O Concello organizará tres mercados:

a) Mercado de artesanía e produtos de alimentación, coincidindo coa romaría de Santa Marta.

b) Feira extraordinaria de Santa Marta

c) Mercado de oportunidades e produtos de segunda man.

-De acordo co establecido no artigo 6.1.d) da Ordenanza reguladora da taxa por instalación de postos, barracas e outros en terreos de uso público do Concello de Cabanas, a participación na Feira do 21 implicará o pago, por cada metro cadrado ou fracción, da cantidade de 0,03 euros día, cun mínimo de 3,00 euros día.

- A participación nestes mercados necesitará de inscrición previa, habendo un período único de inscrición para cada un dos tres que será de 15 días naturais entre o segundo e o cuarto xoves do mes de xullo, ou seguinte día hábil de cadrar estes nun festivo. A inscrición poderá facerse persoalmente no Rexistro do Concello de Cabanas ou por vía telemática a través da sede electrónica do Concello. Con carácter xeral, xunto coa solicitude deberase presentar copia do DNI de quen cubre a solicitude, xustificante bancario de pago, fotografía do posto e acreditacións de estar ao día no pagamento do I.A.E. e cotas da Seguridade Social.

- No mercado de artesanía non poderán participar vendedores de produtos de vestido e complementos que non produzan eles mesmos o seu produto. Así mesmo, é mutuamente exclusiva a participación co mesmo produto no mercado de artesanía e no mercado de oportunidades e produtos de segunda man.

- O concello, reservándose o dereito de organizar os mercados do mellor xeito posíbel, delimitará o espazo asignado a cada posto, que será inalterábel ao longo dos días de duración de cada unha destas feiras e non-intercambiábel. As persoas que por causas médicas de mobilidade ou loxísticas necesiten dun lugar específico para os seus postos haberán de facelo constar expresamente na súa solicitude e anexar un xustificante médico.

- En todo caso, os postos instalados deberán situarse sempre sobre a superficie pavimentada da beirarrúa do Paseo Marítimo, deixando libres os accesos ao piñeiral, os bancos, os colectores de lixo e as papeleiras, así como as franxas de paso delimitadas por parte do concello.

- Os postos e cubertas deberanse soster por si mesmos, non podendo empregar mobiliario urbano (farois, bancos, etc.), cravar piquetas, ou taladrar o chan para o seu soporte.

- Os mercados rexeranse de acordo aos seguintes horarios:

Horario de instalación: de 08:00 a 11:00 horas.

Horario de funcionamento: de 11:00 a 21:00 horas.

Horario de recollida: de 20:00 a 21:30 horas.

- Cada un dos postos será responsábel de deixar limpos de refugallos os espazos ocupados ao final do horario de recollida, para o que depositarán o lixo nos depósitos colocados a tal efecto polo concello. As caixas deberán ser aplanadas para aproveitar axeitadamente a capacidade dos mesmos.

- Non se permite en ningún caso a invasión da beirarrúa por parte de vehículos, agás os expresamente autorizados.

- Non se permite en ningún caso a acampada, o emprego de camping-gas ou lumes, nin a vertedura de augas e líquidos.

- A seguridade dos postos nas horas nocturnas corresponderá ás persoas titulares dos mesmos.

Artigo 7. O Concello poderá autorizar a venda ambulante en mercados ocasionais, incluíndo aqueles xurdidos da iniciativa privada ou con motivo de festas ou acontecementos populares.

Nesta autorización fixarase a duración, a situación, e o pagamento ou exención das taxas de pago por parte destas iniciativas.

Artigo 8. O Concello poderá autorizar a venda ambulante realizada desde camións ou vehículos-tenda. De acordo coa Ordenanza reguladora da taxa por instalación de postos, barracas e outros en terreos de uso público, esta autorización estará supeditada ao pago de 3 € por día de venda, de conformidade co establecido no artigo 6.1.c) da Ordenanza Reguladora da taxa por instalación de postos, barracas e outros en terreos de uso público.

Artigo 9. O Concello poderá autorizar a venda ambulante realizada con ocupación da vía pública, en postos non fixos, de carácter illado, para un número de postos, situación e períodos determinados.

Na autorización correspondente fixarase a duración, a situación, e o pagamento ou exención das taxas de pago por parte de cada un destes postos.

Quedan excluídos da presente regulación os postos na vía pública de carácter fixo e estábel, que desenvolven a súa actividade de xeito habitual e permanente mediante a oportuna concesión administrativa, que se rexerá pola normativa propia.

Artigo 10. O Concello poderá autorizar aos agricultores á venda directa de produtos agrícolas que proveñan exclusivamente das súas explotacións, quedando prohibida a revenda de produtos que teñan unha orixe diferente á da propia explotación.

Na autorización correspondente fixarase a duración, a situación, e o pagamento ou exención das taxas de pago por parte de cada un destes postos.

Artigo 11. Constitúen infraccións unicamente as conductas tipificadas como tales neste artigo:

1. O incumprimento das normas establecidas na presente ordenanza, así como as determinadas na normativa reguladora da defensa dos consumidores e usuarios e demais normativa de aplicación dará lugar á incoación do correspondente procedemento sancionador. As faltas clasificaranse en leves, graves e moi graves.

2. Serán faltas leves:

– Reiterarse na produción de ruídos, berros ou música molestos despois de solicitarse a súa. desistencia

– A falta de ornato ou limpeza das instalacións e da súa zona circulante.

3. Serán faltas graves:

–A reiteración por dúas veces en faltas leves en tres meses, ou de catro en doce meses.

–Non cumprir as normas de seguridade das instalacións e dos seus elementos.

–A venda de produtos distintos dos autorizados.

–A instalación de postos en lugar distinto do autorizado.

–A desobediencia a atender as normas de orde e indicacións da Policía ou Persoal Municipal.

4. Serán faltas moi graves:

–A reiteración por dúas veces de faltas graves en tres meses ou de catro en doce meses.

–A venda de produtos en estado tal que poidan causar dano para a saúde.

–O incumprimento de cantas obrigas impoñan as disposicións aplicábeis por razón da actividade que exerzan, especialmente en materia de disciplina de mercado e comercialización.

–Incumprimento das disposicións sanitarias aplicábeis ás instalacións ou produtos que vendan.

–A instalación de postos sen autorización.

–A venda de produtos prohibidos.

5.- Aquelas infracción da presente ordenanza que sexan concordantes coas establecidas no Lei 3/2014, de 27 de marzo, pola que se modifica o Texto Refundido da Lei Xeral para a defensa dos consumidores e usuarios e outras leis complementarias, aprobado polo Real Decreto Lexislativo 1/2007, de 16 de novembro, seranlles de aplicación o réxime de infraccións e sancións previsto no devandito texto legal, así como nas normas que o desenvolven.

Artigo 12. As sancións que se aplicarán serán as seguintes:

1. Por infracción leve: apercibimento ou multa de até 60,00 euros.

2. Por infracción grave: multa de entre 60,01 a 120,00 euros.

3. Por infracción moi grave: multa de 120,01 a 300,00 euros

Como sanción accesoria poderá acordarse a revogación da autorización para realizar a venda ambulante para o caso de infraccións graves e moi graves, así como a posibilidade de comisar a mercadoría nos casos de venda de produtos non autorizados e nos casos legalmente establecidos.

Correspóndelle á Alcaldía a imposición de multas e demais sancións, a través do correspondente procedemento sancionador, de conformidade co establecido na lexislación vixente.

Artigo 13. Para a determinación das infraccións e imposición de sancións previstas nesta Ordenanza, será de aplicación a regulación contida na Lei 39/2015, de 1 de outubro, do Procedemento Administrativo Común das Administracións Públicas, así como Lei 40/2015, de 1 de outubro, do Réxime Xurídico do Sector Público.

O presente Regulamento, aprobado na sesión ordinaria do Pleno da Corporación, celebrada en data 29 de xaneiro de 2020, entrará en vigor a partir da publicación da súa aprobación definitiva no Boletín Oficial da Provincia, unha vez transcorrido o prazo establecido no artigo 70.2 en, relación co artigo 65.2, da Lei 7/1985, de 2 de abril, Reguladora das Bases do Réxime local, e continuará vixente en tanto non se acorde a súa modificación ou derrogación expresa.