Cabanas - REGULAMENTO DE REXIME INTERNO DAS INSTALACIÓNS DEPORTIVAS DO CONCELLO DE CABANAS

Artigo 1. Obxecto

O presente regulamento ten por obxecto regular o réxime xurídico, xestión, uso e utilización das instalacións deportivas de titularidade do Concello de Cabanas e dítase ó amparo das competencias que nesta materia atribúe ós concellos o artigo 49 da Lei 7 de 1985, de 2 de abril, reguladora das Bases de Réxime Local; artigo 55 do Real Decreto Lexislativo 781 de 1986, do 18 de abril, polo que se aproba o texto refundido da disposición vixente en materia de Réxime Local e artigo 50.3 do Real Decreto 2568 de 1986, do 28 de novembro, polo que se aproba o Regulamento de Organización, Funcionamento e Réxime Xurídico das Entidades Locais.

O presente Regulamento será de aplicación á totalidade das instalacións deportivas municipais nos termos establecidos no artigo terceiro. Tanto para usuarios como para as asociacións, clubs, federacións, agrupacións, anpas, etc.

Artigo 2. Concepto

Considéranse instalacións deportivas, ós efectos deste Regulamento, todos os edificios, pavillóns, dependencias, recintos, campos, pistas, dotacións ou espazos, tanto ó aire libre como cubertos, pechados como abertos, destinados á practica do deporte e a actividade física, en toda a súa gama de modalidades, posibilidades ou finalidades, incluíndo as zonas de equipamento, complementarias ou funcionalmente necesarias, para o desenrolo da actividade deportiva.

Artigo 3. Instalacións deportivas municipais

3.1. As instalacións deportivas definidas no artigo anterior, cuxo titular sexa o Concello de Cabanas, terán a consideración de instalacións deportivas municipais.

3.2. Serán equiparables, a efectos de aplicación de presente regulamento, os espazos que, carecendo de carácter propio de instalacións deportivas, circunstancialmente se habiliten como escenario de actividades deportivas, así como as instalacións deportivas que sen ser de titularidade municipal, tiveran sido cedidas, por calquera título xurídico, ó Concello de Cabanas para a súa xestión. Neste suposto, as citadas instalacións rexeranse polo establecido no presente regulamento salvo que o instrumento de cesión establecera un réxime propio de xestión.

3.3. Salvo que o Concello de Cabanas dispoña doutra cousa, calquera instalación deportiva que se constrúa ou cuxa xestión se asuma polo Concello no futuro, quedará adscrita a este Regulamento.

Artigo 4. Cualificación xurídica dos bens

4.1. De conformidade co establecido na normativa sobre bens das Entidades Locais, as instalacións deportivas municipais terán a cualificación de bens de dominio público, afectos ó uso público ou á prestación do servizo público do deporte.

4.2. Teñen a mesma cualificación, os bens mobles afectados de forma permanente a calquera instalación deportiva municipal, tanto aqueles destinados especificamente á práctica deportiva como daqueles outros destinados ó mantemento das instalacións e equipamentos.

Artigo 5. Clasificación das instalacións.

5.1. En atención ás súas características e condicións de utilización, as instalacións deportivas municipais clasifícanse en instalacións deportivas públicas de uso regulado e de uso aberto. O órgano municipal competente será o encargado de clasificar as instalacións nun ou noutro uso.

5.2. Son instalacións deportivas de uso regulado as sometidas a un réxime específico de utilización, conforme a criterios de prelación e, segundo os casos, coa obrigatoriedade de satisfacer os prezos establecidos polo uso das mesmas.

5.3. Son de uso aberto as que se usan sen ningún condicionante. Estas instalacións quedan excluídas do presente regulamente, non obstante, o órgano municipal competente pode marcar reservas de uso, por necesidades propias específicas ou por reservas solicitadas por diversas entidades ou persoas.

Artigo 6. Uso das instalacións deportivas

6.1. As instalacións deportivas municipais estarán dedicadas á práctica da actividade físico-deportiva escolar, ó deporte de ocio e tempo libre da cidadanía en xeral, así como ó deporte de exhibición, competición e alto rendemento, incluso de carácter profesional.

6.2. En cada instalación, como norma xeral, solo poderán practicarse os deportes a que especificamente estivese destinada a mesma e previa autorización municipal, aqueles outros cuxo exercicio resulte tecnicamente posible.

6.3. Con independencia dos usos deportivos pertinentes, tamén poderán autorizarse nas instalacións deportivas municipais outras actividades non deportivas que resulten compatibles coas infraestruturas existentes e nas condicións particulares que se determinen, procurando que non interfiran no funcionamento normal das mesmas.

Artigo 7. Acceso ás instalacións deportivas

7.1. As instalacións deportivas, independentemente da forma de xestión, son de acceso libre para toda a cidadanía, de forma individual ou colectiva, sen outras limitacións que as establecidas nas leis ou neste regulamento. En consecuencia, poden ser utilizadas tanto polas persoas físicas como polas persoas xurídicas.

7.2. Non obstante, o acceso ás instalacións deportivas estará condicionado polo aforo de cada instalación, as limitacións de capacidade que circunstancialmente se establezan, e ó pago dos prezos públicos vixentes establecidos para a actividade ou instalación deportiva de que se trate, cando proceda.

Do mesmo xeito, estará condicionado pola normativa específica aplicable en caso de actividades e espectáculos con asistencia de público e de acordo co orde de preferencia previsto por este regulamento.

7.3. Por conseguinte, abriranse ó público para a práctica deportiva, o ocio, o desenrolo de programas de promoción, iniciación, adestramento ou competición deportiva, teñan ou non carácter municipal, estando para elo a disposición de cantas federacións, clubs e demais figuras asociativas dentro do deporte, centros docentes e en xeral as persoas físicas ou xurídicas que concerten ou accedan puntualmente a súa utilización nas condicións reguladas polo presente Regulamento.

Artigo 8. Calendario

A apertura e funcionamento das instalacións deportivas municipais de uso regulado guiaranse polo calendario, horarios e usos que se establezan anualmente.

Artigo 9. Formas de uso

9.1. O uso das instalacións deportivas municipais de uso regulado implica o pago do prezo público establecido na correspondente norma reguladora.

9.2. As instalacións, conforme ás normas recollidas neste regulamento, as poderán usar as persoas físicas ou xurídicas.

9.3. En calquera caso, está prohibido a exhibición ou uso nas instalacións deportivas municipais dos seguintes obxectos:

a. Pancartas, símbolos, emblemas ou lendas que, polo seu contido ou significado, poidan incitar á violencia.

b. Armas ou obxectos utilizables como armas.

c. Bengalas ou fogos de artificio.

d. Aqueles obxectos ou instrumentos que se establezan regulamentariamente.

9.4. Teñen consideración de usos, actividades ou actos ordinarios:

- A utilización puntual e illada dunha instalación ou espazo deportivo para o seu uso específico, previo pago do prezo da mesma cando corresponda, ben individual ou colectivamente.

- O uso colectivo puntual, de temporada ou anual dunha instalación ou espazo deportivo para o seu uso específico previo pago da taxa que corresponda no seu caso.

- O uso deportivo puntual, de temporada ou anual dunha instalación ou espazo deportivo para unha modalidade diferente da específica pero perfectamente compatible e autorizadas, acolléndose se corresponde ás condicións de pago establecidas.

- A utilización puntual, temporal ou anual dunha instalación ou espazo deportivo para unha actividade non deportiva especificamente, pero perfectamente compatible pola súa afinidade, nas condicións autorizadas polo órgano competente.

9.5. Teñen consideración de usos, actividades ou actos extraordinarios:

- A utilización puntual, illada ou temporal, individual ou colectivamente, dunha instalación ou espazo deportivo para unha actividade deportiva diferente da específica do mesmo e requira unha autorización expresa do Concello de Cabanas.

- A utilización con carácter puntual, ou no seu caso periódica, dunha instalación ou espazo deportivo para unha actividade non deportiva, que requira unha autorización expresa do Concello de Cabanas

9.6 O Concello de Cabanas resérvase a facultade de pechar temporalmente as instalacións por limpeza, obras, programacións propias, competicións, partidos, cursos ou outros eventos que estime oportunos.

Artigo 10. Solicitudes e autorizacións

10.1. Toda utilización das instalacións deportivas municipais de uso regulado contará, preceptivamente, coa debida autorización.

10.2. O uso das instalacións deportivas municipais, en función das súas características específicas, poderá cederse por anualidades, cursos escolares lectivos, por temporadas, por un período de tempo concreto inferior a un ano ou para partidos, actos ou usos puntuais e concretos. En todo caso deberá determinarse claramente o horario obxecto da cesión do uso que deberá respectarse con puntualidade, non comprendendo, por tanto, a utilización anterior ou posterior para adestramentos, ensaios ou montaxes que serán convidos cos interesados.

10.3. Para usos deportivos dun so día, as persoas interesadas solicitarán directamente no Concello de Cabanas a utilización da mesma nos horarios dispoñibles, sen outro requisito que o de aboar por adiantado o importe do prezo fixado. Os prazos e condicións os marcarán as normas anuais de utilización e calendario das mesmas.

10.4. Para usos non continuos, entendéndose por tal aquel cuxa petición de uso o sexa por unha duración inferior ó mes, a solicitude de utilización deberá realizarse por escrito, cunha antelación mínima de quince días ás datas previstas para o uso da instalación de que se trate. O abono do prezo efectuarase unha vez autorizado o uso e con carácter previo a este.

10.5. No caso de usos continuos ou de tempada, e con antelación ó inicio da tempada deportiva, o Concello de Cabanas anunciará convocatoria pública pola que se regulará a adxudicación das instalacións deportivas de uso regulado. Unha vez aprobada á adxudicación, polo órgano municipal competente, quen o desexe poderá darse de baixa, na data que consideren oportuno, comunicándoo por escrito ó Concello.

10.6. No caso de que nunha instalación concorran simultaneamente dúas ou máis solicitudes de uso incompatibles entre si, atenderase, para resolver a prioridade, o establecido no artigo 14 do presente regulamento e, en caso de igualdade, a repercusión social da actividade que se vaia desenvolver.

10.7. A autorización ou concesión do uso das instalacións deportivas municipais constitúe un dereito intransferible, polo que os seus titulares non poderán ceder nin intercambiar os usos concedidos, salvo conformidade municipal.

10.8. Cando se atopase en mal estado a instalación ou o material a utilizar, de tal forma que fixese impracticable ou perigosa a práctica de calquera actividade deportiva, poderase solicitar a devolución do importe ou un novo uso, sen cargo algún, dentro dos oito días seguintes á data prevista e se poderá realizar sempre que exista instalación e horario dispoñible a tal fin. En caso de non solicitar este cambio no tempo establecido, a persoa usuaria decaerá no seu dereito.

Do mesmo xeito, no suposto de reparacións imprevistas nas instalacións deportivas, intentarase na medida do posible ofrecer un novo espazo deportivo de características similares. Se isto non fora posible, a persoa usuaria terá dereito a solicitar a devolución do prezo público correspondente.

En todo caso, a non utilización da instalación reservada por causa imputable á persoa interesada non exime do pago do prezo establecido e tampouco dará lugar á devolución total ou parcial do importe satisfeito.

10.9. A autorización do uso das instalacións deportivas municipais estará supeditada, en todo caso, ás necesidades do Concello de Cabanas.

10.10. O Concello de Cabanas resérvase a facultade de modificar ou anular os usos xa concedidos e a de suspender temporalmente o servizo por razóns de interese municipal, sen que isto caiba responder de posibles prexuízos ante as persoas interesadas, excepto a devolución proporcional dos prezos satisfeitos.

Artigo 11. Outros usos

11.1. Excepcionalmente poderase autorizar o uso das instalacións deportivas municipais fora do horario ou calendario de apertura establecidos con carácter ordinario.

11.2. A celebración de actividades deportivas en horario ou calendario extraordinarios, por iniciativa allea ó Concello de Cabanas, suporá un incremento sobre o prezo fixado para o mesmo uso, no que se computarán todas as horas, tanto as de preparación como as precisas para o desenvolvemento do evento ou espectáculo.

11.3. Nos casos nos que as actividades a celebrar nunha instalación deportiva municipal, sexan ou non deportivas, requiran montaxe e desmontaxe de equipamentos, computarase o tempo destinado a ditas operacións, o que suporá un incremento sobre o prezo fixado. O incremento terá lugar do mesmo xeito cando a cesión das instalacións requira da achega adicional de persoal que estea a cargo da instalación.

As labores de montaxe e desmontaxe levaranse a cabo por conta e iniciativa de quen empregue a instalación deportiva, e baixo supervisión do persoal responsable da mesma. Tamén serán da súa conta os gastos de vixilancia, limpeza, enganches, consumos de enerxía eléctrica e demais servizos ocasionados polo montaxe e desmontaxe de equipamentos así como para o desenrolo da actividade.

Artigo 12. Da custodia de obxectos e equipaxes

12.1. O Concello de Cabanas non responderá dos obxectos persoais que se extravíen ou deterioren no recinto das instalacións deportivas municipais e aconsella acudir as instalacións deportivas municipais sen obxectos de valor.

12.2. Nas instalacións que se conte con consignas automáticas, será responsabilidade de quen usa a mesma, que terá que custodiar a chave, a igual que será a súa responsabilidade a custodia da identificación de gardarroupa así como no seu caso da chave dos vestiarios, non sendo responsabilidade do Concello as consecuencias derivadas da perda da identificación de gardarroupa ou das chaves da consigna ou vestiarios.

12.3. No caso da perda da chave da consigna ou vestiarios ou do obxecto identificador do gardarroupa, esperarase ó final do día para proceder a abrir a consigna e devolver o contido, salvo que exista a certeza de que a persoa que reclama é a auténtica dona das pertenzas.

12.4. Queda prohibida a ocupación das consignas ou vestiarios dun día para outro. En tal caso ó peche da instalación ó persoal procederá á retirada dos obxectos que nela se atopen tratándoos como obxectos perdidos.

12.5. Os obxectos recollidos nas instalacións deportivas municipais estarán depositados nas oficinas da Policía Municipal.

Artigo 13. Restricións de uso e prohibicións

13.1. O único lugar onde está permitido o cambio de roupa é no vestiario, que lle será asignado a cada persoa ou grupo polo persoal da instalación.

13.2. Ás instalacións cubertas con chan de parqué ou materiais sintéticos só se accederá con vestiario e calzado deportivo, nunca co de rúa. Só se poderá permanecer con roupa e calzado de rúa nas zonas de paso e nas reservadas ó público.

13.3. Prohíbese ó acceso ó interior das instalacións deportivas de bicicletas, ciclomotores, patíns, monopatíns, etc. Excepto en caso de instalacións específicas ou autorización expresa por actividade programada.

13.4. Prohíbese o consumo de tabaco, de bebidas alcohólicas e alimentos ou realizar calquera acto que produza desperdicios, excepto nas zonas habilitadas ó efecto.

13.5. Fóra das canchas de pavillóns polideportivos, frontóns e instalacións homólogas non se poderá realizar actividade deportiva ou xogo algún, por tratarse de zoas destinadas ó tránsito e estancia de persoas usuarias e público.

13.6. Non está permitida a entrada de animais ás instalacións deportivas municipais.

Artigo 14. Prioridades de uso

14.1. A utilización das instalacións deportivas obedecerá a criterios de uso preferente de conformidade á orde de prelación determinado a continuación, en función do obxecto das solicitudes que se presenten e das propias necesidades municipais.

14.2. Dentro do horario lectivo escolar, terá uso preferente das instalacións deportivas municipais o alumnado dos respectivos centros públicos de educación primaria, para o desenvolvemento de programas de educación física recollidos no seu currículo.

14.3. No suposto de que as solicitudes de utilización simultánea das instalacións superen a capacidade destas, terán prioridade os colexios públicos de educación primaria cuxo emprazamento estivese máis próximo a ditas instalacións.

14.4. O uso das instalacións deportivas municipais en horario lectivo por parte do alumnado pertencente a centros escolares privados, ou a centros docentes –públicos ou privados- de educación secundaria, quedará supeditado ó uso do alumnado procedente dos centros públicos de educación primaria.

14.5. En horario non lectivo, as instalacións deportivas municipais utilizaranse, pola seguinte orde, para o desenrolo de programas municipais de iniciación e promoción deportiva (as que terán acceso toda a cidadanía que o desexe sen outra limitación que as propias da instalación ou as dispoñibilidades do programa); para necesidades de clubs e sociedades deportivas do concello e para o deporte de ocio da cidadanía.

14.6. A prioridade de uso entre os clubs e sociedades deportivas do concello se discernirá en atención ós seguintes criterios:

a) A adecuación do espazo ó seu deporte.

b) A categoría en que milite o equipo de máis alto nivel do club ou sociedade solicitante sempre e cando desexe facer uso da instalación.

c) Polo número de equipos participantes noutras categorías.

Como norma xeral o Concello poderá regular o funcionamento de todas aquelas dotacións deportivas que requiran normas específicas de funcionamento.

SECCIÓN PRIMEIRA. Pavillóns polideportivos. Salas de usos múltiples.

Artigo 15. Polideportivos e salas polivalentes

As salas polivalentes, ximnasios e polideportivos, réxense polos principios xerais como instalacións deportivas básicas.

Artigo 16. Salas de musculación

No uso das salas municipais de musculación establécense as seguintes limitacións, prohibicións e recomendacións específicas:

a) Queda prohibida a entrada e utilización dos aparatos a menores de 16 anos que non vaian acompañados dun profesor ou profesora de educación física.

b) Ás salas de musculación soamente poderán acceder as persoas que vaian a realizar a actividade.

c) Non se poderán introducir nas salas de musculación bolsas, mochilas ou calquera outro elemento innecesario para o desenrolo da actividade ou que poidan constituír molestia para os demais usuarios ou desvantaxes para o réxime de funcionamento da instalación.

d) Por razóns de seguridade e hixiene, recoméndase a utilización de guantes e é obrigatorio o uso de toallas ou elementos substitutivos.

e) Despois do uso dos materiais deixaranse no seu lugar designado.

f) Respectarase o lugar marcado como zoa de pesos libres.

SECCIÓN SEGUNDA. Solariums.

Artigo 17. Zonas de solarium

Considéranse zonas de solarium aqueles lugares destinados a tomar o sol nas instalacións deportivas, sexan de herba ou doutro material.

Artigo 18. Obrigas, restricións de uso e prohibicións específicas

18.1. Estará permitido o acceso calzado polas zonas pavimentadas ou para dirixirse a puntos concretos non accesibles por medio de zonas pavimentadas. Nos demais casos deberase permanecer cos pes descalzos ou con chancletas.

18.2. Queda totalmente prohibido comer calquera tipo de alimento fora das zonas habilitadas e sinalizadas ó efecto, ó igual que acceder ás zonas de herba con recipientes de cristal.

18.3. Non está permitido na zona de solarium a práctica de deporte algún, nin o uso de materiais deportivos, nin aquelas accións que perturben a tranquilidade das persoas: xogos violentos, carreiras, aparatos de música, uso de agullas ou calquera outra actividade que supoña un perigo ou perturbe o normal uso da zona de solarium.

18.4. Non se permitirá a utilización de hamacas, parasoles, mesas, cadeiras, etc. agás situacións especiais na forma e lugares que expresamente se sinalicen.

18.5. Non se permitirá a entrada de animais.

SECCIÓN TERCEIRA. Campos de fútbol e pistas de pádel

Artigo 19. Reservas

19.1. A reserva de pista farase directamente no Concello de Cabanas.

19.2. As reservas poderanse realizar con tres días de antelación.

19.3. Só se poderá alugar un máximo de tres horas por usuario e día, salvo autorización expresa do Concello de Cabanas.

19.4. A efectos de control anotarase no correspondente cuadrante, o número de D.N.I.daquela persoa que vaia a utilizar a instalación deportiva municipal.

19.5. Será obrigatorio confirmar 5 minutos antes da hora de comezo a reserva da instalación, mediante a entrega do correspondente documento acreditativo. De non facerse así se porá a pista á disposición dos demais usuarios.

19.6. Non poderán entrar acompañantes ás pistas.

Artigo 20. Normas de utilización

20.1. Deberá solicitarse o uso das instalacións deportivas municipais para actividades e espectáculos con asistencia de pública cunha antelación mínima de quince días á celebración do acto ou do comezo da actividade.

20.2. Nas instalacións deportivas municipais onde terán lugar actividades ou espectáculo con asistencia de público de pago, as entradas á venda axustaranse en número e características ó aforo oficial da instalación.

20.3. Cando se trate de actos de asistencia gratuíta en recintos pechados, o acceso do público efectuarase co debido control e respectando o aforo máximo de cada recinto.

20.4. Non poderán habilitarse zonas de pista para acomodo de público, salvo situacións excepcionais a xuízo e consentimento expreso do Concello de Cabanas.

20.5. O concesionario do uso dunha instalación deportiva municipal para celebrar actividades ou espectáculos con público, deberá aportar as súas expensas todo o persoal necesario para o seu completo desenrolo cando, a criterio do Concello de Cabanas, as necesidades excedan as posibilidades ou funcións do persoal asignado ó funcionamento ordinario das instalacións, podendo esixirse, incluso, persoal encargado en cada acto do acceso ás instalacións, vixilancia e servizo de orden no interior das mesmas e atención a usuarios/as e público en xeral. Dito persoal estará subordinado ó persoal responsable das instalacións.

20.6. En todo caso, serán por conta da entidade concesionaria do uso da instalación os gastos de montaxe e desmontaxe de equipamentos e os do servizo de protección e seguridade de bens e persoas que requira o desenvolvemento do acto. Así como as licencias especiais, que no seu caso deberan solicitarse, e a responsabilidade civil que puidera derivarse a consecuencia das actuacións desenvoltas.

20.7. As instalacións deportivas municipais que alberguen actividades ou espectáculos públicos de organización allea ó Concello de Cabanas, e que carezan de palco ou tribuna municipal, disporán necesariamente dun lugar preferente reservado á corporación municipal cuxo emprazamento e capacidade determinará o propio Concello ó conceder o uso do que se trate. Nos casos que proceda, dita reserva ampliarase a outras autoridades e persoas invitadas.

20.8 Nas instalacións deportivas que conten con tribuna ou palco municipal, este e por extensión calquera outro que puidera existir de carácter institucional atoparase a disposición exclusiva permanentemente do seu titular, sen máis requisito que acceder ó mesmo, por parte dos seus posibles ocupantes que acreditar a súa condición respecto ó Concello de Cabanas.

Artigo 21. Normas xerais

21.1. As instalacións deportivas municipais poderán dispoñer de espazos ou zoas destinadas á publicidade, que o Concello de Cabanas determinará e asignará libremente.

21.2. A concesión do uso das instalacións deportivas municipais non implica a do aproveitamento publicitario das mesmas.

21.3. A publicidade que figure nas instalacións deportivas do Concello de Cabanas aterase ás disposicións vixentes sobre materia e precisará, preceptivamente, conformidade municipal.

21.4. Quen sexa titular da cesión de uso de instalacións deportivas municipais, para celebración de acontecementos deportivos ou non deportivos, poderán beneficiarse por autorización ou concesión municipal do aproveitamento publicitario das zonas habilitadas ó efecto.

21.5. Non obstante, só poderán negociar publicidade para o tempo de desenrolo dos seus respectivos actos públicos e nos lugares que expresamente se lles asigne, correndo da súa conta todas as operacións e os costos que se deriven do aproveitamento.

21.6. Nos pavillóns polideportivos, como criterio xeral, a publicidade xestionada polas persoas ou entidades usuarias figurará principalmente sobre o chan da pista, fóra da zoa de xogo, ben horizontalmente ou sobre soportes verticais móbiles, e coas características materiais que determinen os servizos municipais correspondentes.

21.7. Non se permitirá a inserción de publicidade na zoa de xogo das pistas, con excepción da publicidade que promova o Concello de Cabanas e, ocasionalmente, da concertada con carácter xeral polas respectivas ligas dos clubs usuarios.

21.8. Quen utilice as instalacións deportivas municipais non poderán colocar publicidade nos lugares interiores de tránsito das mesmas (vestíbulo, corredores, etc.) salvo, excepcionalmente, autorización expresa.

Artigo 22. Explotación de consumibles

22.1. O dereito de explotación de artigos consumibles no recinto das instalacións deportivas municipais pertence ó Concello de Cabanas, podendo ceder, non obstante, o aproveitamento desta clase de explotación na forma que estime procedente.

22.2. En tal caso, o cesionario observará o cumprimento da normativa correspondente e moi especialmente a aplicable ó despacho e consumo no interior das instalacións deportivas de bebidas alcohólicas e tabaco.

22.3. Queda prohibido introducir e utilizar no recinto das instalacións envases e recipientes de cristal ou de calquera outro material considerado perigoso.

Artigo 23. Dereitos das persoas usuarias

Todas as persoas usuarias posuirán idénticos dereitos respecto ó uso e goce das instalacións, que se concretan nos seguintes:

a) Utilizar as instalacións deportivas municipais conforme ó calendario, horario e demais condicións de uso.

b) Ser tratadas con respecto e deferencia polo persoal que presta os seus servizos na instalación deportiva.

c) Formular ó Concello de Cabanas cantas peticións, suxestións ou queixas consideren oportunas sobre o funcionamento da instalación.

d) Esixir do Concello de Cabanas o cumprimento de canto dispoña a normativa aplicable.

e) Colaborar no bo mantemento da instalación por medio da comunicación coas persoas responsables dos defectos observados así como coas súas suxestións.

f) Solicitar a identificación de calquera das persoas empregadas ou responsables das instalacións deportivas, ós efectos de realizar as reclamacións correspondentes.

g) Ser informado sobre as condicións de uso das instalación deportivas municipais, así como sobre os programas deportivos ofertados nelas.

h) Calquera outro dereito que veña recoñecido pola lexislación vixente e polo disposto neste regulamento.

Artigo 24. Obrigas das persoas usuarias

24.1. O acceso ás instalacións deportivas municipais supón a aceptación da totalidade das normas comprendidas neste regulamento.

24.2. Toda persoa interesada na utilización das instalacións deportivas municipais está obrigada a solicitar autorización de uso segundo o procedemento fixado e aboar o prezo público correspondente dentro dos prazos e forma establecida.

24.3. Coas excepcións que en cada caso poidan determinarse, a cesión de uso das instalacións municipais non inclúe o subministro e utilización de material deportivo, polo que este deberá ser aportado polas propias persoas usuarias e axustarse en todas as súas características ás condicións regulamentarias establecidas para a modalidade deportiva de que se trate.

24.4. Todas as persoas usuarias están obrigadas á estrita observancia das normas establecidas en calquera das instalacións deportivas. Dito cumprimento será esixido polo persoal encargado das instalacións, como responsable de cumprir e facer cumprir directamente as disposicións vixentes.

24.5. As persoas usuarias das instalacións deportivas municipais manterán en todo momento actitudes de consideración e respecto cara os demais e cara o persoal encargado das instalacións. Na súa relación con estes últimos están obrigados ó cumprimento de cantas instrucións ou observacións reciban sobre o bo orde e funcionamento das instalacións, e sobre a disposición e utilización de materiais e dotacións.

24.6. Abonar o prezo público correspondente ó servizo ou a actividade escollida, dentro dos prazos e normas que se establezan na correspondente ordenanza.

24.7. Corresponderá á entidade usuaria (asociación, club, agrupación, etc.) solicitar e obter das autoridades competentes as autorizacións preceptivas esixibles, así como estar en posesión dos preceptivos seguros de accidentes para ditas actividades. Cumprir tamén coas sancións que impoña o Concello.

24.8. O incumprimento das presentes normas, así como os actos de vandalismo e mal comportamento, poderán dar lugar ás sancións previstas neste regulamento así como á reparación, reposición e/ou abono dos danos ocasionados.

No caso de persoas usuarias pertencentes a clubs ou sociedades deportivas, estas serán responsables subsidiarios do comportamento dos seus membros.

Artigo 25. Responsabilidade das persoas usuarias

25.1. As persoas usuarias deberán deixar as instalacións utilizadas en perfecto estado para o uso seguinte. Por outra parte, asumirán a responsabilidade plena e directa polos danos e prexuízos que se produzan nas instalacións durante a utilización das mesmas, así como os ocasionados nas demais dependencias do local ou edificio e os sufridos por persoas físicas como consecuencia da actividade autorizada.

25.2. Considerarase responsable directo do uso realizado ó titular da autorización, salvo que acredite a representación que ostenta, en cuxo caso a responsabilidade recaerá sobre o representado.

25.3. A seguridade dos menores de idade é responsabilidade única dos seus pais, nais ou das persoas adultas que os acompañen, quen tamén se farán responsables en caso de incumprimento por aqueles das normas de funcionamento das instalacións deportivas municipais.

25.4. O Concello de Cabanas non se fará responsable ante as persoas usuarias en caso de accidentes ou danos que poidan sufrir estas derivados do seu propio incumprimento das presentes normas o dunha utilización inadecuada ou imprudente das instalacións deportivas.

25.5. As persoas usuarias das instalacións deportivas municipais serán responsables dos danos ou lesións que ocasionen tanto ás instalacións como a terceiros.

Artigo 26. Réxime xurídico e procedemento

26.1. A esixencia de responsabilidade pola comisión de infraccións tipificadas neste regulamento axustarase ó procedemento legal e regulamentariamente establecido para o exercicio da potestade sancionadora.

26.2. Cando o órgano competente para iniciar o procedemento sancionador tivera coñecemento de que os feitos, ademais de poder constituír unha infracción administrativa, puideran ser constitutivos dunha infracción penal, comunicarallo ó órgano xudicial competente, absténdose de proseguir ó procedemento sancionador, unha vez incoado, mentres a autoridade xudicial non se teña pronunciado.

Durante o tempo que estivera en suspenso o procedemento sancionador, entenderase por suspendido tanto o prazo de prescrición da infracción como a caducidade do propio procedemento.

Artigo 27. Clasificación de infraccións

As infraccións clasificaranse en leves e graves, tal e como se sinala a continuación:

a) Infraccións leves:

- Incumprimento das normas específicas de uso de cada instalación.

- O trato incorrecto a calquera persoa usuaria ou o persoal da instalación.

- O uso de carné ou pase por persoa diferente ó titular do mesmo.

- A práctica de xogos ou deportes en áreas non destinadas ó efecto.

- Calquera outro incumprimento das obrigas, prohibicións ou limitacións establecidas nesta normativa que non sexan graves.

b) Infraccións graves:

- Roubar ou deteriorar intencionadamente as instalacións, equipamentos, material deportivo ou pertenzas e obxectos das persoas usuarias.

- Non atender de forma reiterada ás indicacións que as persoas responsables establezan para o bo funcionamento das instalacións.

- O incumprimento da prohibición establecida no artigo 9.3 deste regulamento.

- A alteración do orden no interior das instalacións.

- A comisión de tres infraccións leves.

Artigo 28. Sancións

28.1. Os actos constitutivos de infracción serán sancionados tal e como se dispón neste artigo.

Para a graduación das sancións terase en conta a intencionalidade, neglixencia ou gravidade da acción cometida.

a) Como consecuencia das infracción leves, poderase impoñer a oportuna sanción consistente no apercibimento por escrito, ou a perda da condición de persoa usuaria por un prazo de ata 15 días.

b) Como consecuencia das infraccións graves, poderase impoñer a oportuna sanción consistente na perda da condición de persoa usuaria por un prazo de ata 30 días, ou a perda definitiva da citada condición de persoa usuaria.

A perda da condición de persoa usuaria como consecuencia da imposición dunha sanción suporá a perda do prezo que esta houbera aboado para o uso da instalación.

28.2. Non obstante, no caso de que a persoa usuaria actúe de forma notoriamente contraria ó presente regulamento e faga caso omiso das advertencias verbais efectuadas, o persoal responsable das instalacións está facultado para esixirlle ó abandono das mesmas, sen prexuízo das posteriores accións que resulten aplicable.

28.3. No caso de incumprimento, e con independencia da sanción que, no seu caso, resulte aplicable pola comisión dunha infracción, a persoa usuaria deberá proceder á reparación, reposición e/ou abono dos danos causados.

28.4. O Concello executará, a costa do obrigado, os actos precisos para repoñer as cousas ó estado no que se atopaban antes da infracción, se aqueles non tiveran sido desenrolados polo infractor. A esixencia do custe ó obrigado realizarase en base o establecido no ordenamento xurídico.

28.5. Iniciado o expediente sancionador, poderanse adoptar en calquera momento do mesmo as medidas provisionais imprescindibles para o normal desenvolvemento do procedemento, asegurar o procedemento da sanción que puidera impoñerse ou evitar a comisión de novas infraccións.

Artigo 29. Responsabilidade polo uso das instalacións

29.1. O Concello de Cabanas non será responsable das lesións que poida sufrir a persoa usuaria salvo que deriven dun mal estado da instalación ou dos bens adscritos á mesma conforme á normativa xeral sobre responsabilidade das Administración Públicas.

29.2. En todo caso, o Concello de Cabanas non será responsable ante o usuario no caso de accidentes ou danos derivados do incumprimento por parte deste das presentes normas, dun comportamento neglixente doutro usuario ou dun mal uso das instalacións, equipamentos e servizos.

Este regulamento aprobado polo pleno da Corporación en data 27 de marzo de 2013, derroga o publicado no BOP nº 112 do 19 de maio de 1997, entrará en vigor a partir da publicación da súa aprobación definitiva no Boletín Oficial da Provincia e unha vez transcorrido o prazo a que se refire o artigo 70.2 en relación co artigo 65.2 da Lei 7/1985, de 2 de abril, reguladora das bases do réxime local, e permanecerá en vigor ata que se acorde a súa modificación ou derrogación.

O regulamento dispón a súa entrada en vigor unha vez publicado o seu texto completo no Boletín oficial da Provincia, e transcorrido o prazo previsto ao que se refiren os artigos 70.2 e 65.2  da Lei 7/1985, de 2 de abril, reguladora das Bases do Réxime Local:

Artigo 70.2: “…..Las ordenanzas, incluídos el articulado de las normas de los planes urbanísticos, así como los acuerdos correspondientes a éstos cuya aprobación definitiva sea competencia de los entes locales, se publicarán en el “Boletín Oficial” de la provincia y no entrarán en vigor hasta que se haya publicado completamente su texto y haya transcurrido el plazo previsto en el artículo 65.2 salvo los presupuestos y las ordenanzas fiscales que se publican y entran en vigor en los términos establecidos en la Ley 39/1988, de 28 de diciembre, Reguladora de las Haciendas Locales.....” (desde el 10 de marzo de 2004 RDL 2/2004, de 5 de marzo).

Artigo 65.2: “El requerimiento deberá ser motivado y expresar la normativa que se estime vulnerada. Se formulará en el plazo de quince días hábiles a partir de la recepción de la comunicación del acuerdo.”

Ó no ter coñecemento da fecha exacta da recepción da comunicación do acordo, o Servizo de Asistencia Económica a Municipios toma como fecha estimada da súa entrada en vigor o prazo de quince días hábiles a partir da publicación definitiva.