Estás en:Novas

A Deputación presenta a comarca do Eume ao programa de Plans de Sustentabilidade Turística en Destino

O vicepresidente, Xosé Regueira, mantivo unha xuntanza con representantes dos concellos das Pontes, Cabanas, Monfero, Pontedeume e A Capela para avaliar os principais eixes do proxecto técnico que presentará á convocatoria do Ministerio de Industria, Comercio y Turismo

O proxecto, orzado en 3,9 millóns de euros, está orientado á diversificación e competitividade turística, e á conservación do capital natural da contorna, garantindo a súa sustentabilidade e os usos de carácter natural do ecosistema das Fragas do Eume

A Deputación presenta a comarca do Eume ao programa de Plans de Sustentabilidade Turística en Destino

O vicepresidente da Deputación e responsable da área de Turismo, Xosé Regueira, mantivo esta mañá unha xuntanza con representantes dos cinco concellos da comarca do Eume para avaliar os principais eixes do proxecto que presentará á convocatoria de Plans de Sustentabilidade Turística en Destino. Na xuntanza participaron tanto concelleiros e concelleiras como técnicos e técnicas de Turismo e representantes do sector privado e do tecido asociativo dos concellos das Pontes, Cabanas, Monfero, Pontedeume e A Capela.

Tras a xuntanza desta mañá, a Deputación presentará o proxecto á convocatoria extraordinaria de Plans de Sustentabilidade que convoca o Ministerio de Industria, Comercio y Turismo, e que se financiará con fondos de recuperación europeos -os denominados Next Generation-.

Xosé Regueira explicou que o proxecto técnico inclúe tanto o ámbito do parque natural Fragas do Eume como outros recursos de carácter natural e patrimonial da comarca e cualificouno como "un proxecto ben estudado e xa totalmente deseñado para implantar no territorio", ao tempo que asegurou que "estamos en disposición de acompañalo nunha candidatura potente". A avaliación do investimento total no territorio en todas as accións previstas nos catro eixes que inclúe a memoria técnica sitúase en torno a 3.900.000 euros.

Neste sentido, o vicepresidente tamén afirmou tras a xuntanza que a comarca do Eume "ten un potencial turístico enorme pero está nun proceso de desindustrialización complexo e, polo tanto, necesita tamén novos alicientes económicos para seguir xerando dinámicas positivas para a economía".

Os catro eixes que se inclúen na memoria técnica recollen intervencións concretas enfocadas a aumentar a competitividade turística do territorio; incorporar a sustentabilidade e a dixitalización ao proxecto turístico e económico que se quere implantar; diversificar a oferta no ámbito turístico así como no ámbito cultural e no das novas tecnoloxías; e garantir que o capital natural do sistema turístico vai tender á perennidade, é dicir, que non se vai distorsionar a sustentabilidade dunha contorna tan sensible como é a propia Fraga nin os usos de carácter natural que deber este ecosistema.

Páxinas suxeridas