Estás en:Novas

A Deputación da Coruña triplica as axudas ao sector cultural

Do millón de euros en dúas convocatorias de 2015 pasa a tres millóns e medio en oito liñas de axudas para a cultura de base

A Deputación da Coruña triplica as axudas ao sector cultural

A área de Cultura da Deputación da Coruña triplica o orzamento destinado ao apoio da cultura de base chegando nesta nova convocatoria a 3.465.000 €, en oito liñas de axuda en concorrencia competitiva fronte ás dúas que se publicaban no anterior mandato. A estas liñas hai que sumar ás destinadas aos concellos e á Rede Cultural que tamén duplica o orzamento.

A Deputación da Coruña experimentou unha modificación radical do modelo de xestión ao centrar o apoio ao sector cultural en liñas de axuda en concorrencia competitiva, con criterios obxectivos, que se consolida no actual exercicio cun orzamento que multiplica por tres e medio o anterior e cuadriplicando o número de convocatorias, para adaptalas as necesidades e a natureza do ámbito cultural. A convocatoria de liñas de axuda está aberta até o vindeiro 15 de febreiro.

"O número de convocatorias e o orzamento supoñen un cambio substancial na xestión cultural, que centra a súa actuación en liñas de axuda públicas con criterios obxectivos, incrementando o apoio ao sector que crea e difunde cultura mais eliminando o clientelismo. Na área de Cultura da Deputación da Coruña conseguimos que a xestión fose transparente e con convocatorias abertas a todo o sector", explica a vicepresidenta e responsábel da área de Cultura da Deputación da Coruña, Goretti Sanmartín Rei.

Desta maneira, dunha convocatoria xeral para entidades culturais pasouse a un panorama en que, ademais da liña á que concorren as asociacións para actividades e investimentos -dotadas con 1.000.000 e 300.000 € respectivamente- súmase seis convocatorias máis entre as que está a destinada a entidades ou fundacións que sexan titulares de museos, centros de interpretacións ou bibliotecas que optan a un orzamento de 465.000 €.

A cultura popular representada por corais polifónicas, bandas de música populares, entidades de música e baile tradicional e formacións musicais de grande formato contan tamén con dúas liñas de axuda específica creadas no presente goberno, unha delas dotada con 480.000 € para actividades e outra con 195.000 € para investimentos.

De nova creación é tamén a convocatorias destinadas a festivais que suman máis dun millón de euros, 500.000 para os organizados por entidades. A estas partidas súmanse tres convocatorias ás que poden concorrer empresas do sector cultural como son as de proxectos singulares, con 200.000 €, a de distribución audiovisual en galego, con 125.000 € e á de proxectos culturais pola igualdade, Luísa Villalta que esta dotada con 200.000 €.

En total, son 3.465.000 € que a área de Cultura da Deputación da Coruña xestiona para afortalar o sector cultural por medio de convocatorias en concorrencia competitiva, con comisións técnicas de valoración externas -formadas por especialistas de recoñecido prestixio- e con criterios claros e transparentes.

Páxinas suxeridas