Estás en:Novas

A Deputación da Coruña destina 1,3 millóns de euros a apoiar os clubs e entidades na promoción do deporte na provincia

As cinco liñas de subvencións abertas teñen como obxectivo fomentar a actividade deportiva en todos os seus ámbitos e apoiar o traballo de centos de clubs e deportistas coruñeses

715 entidades deportivas coruñesas recibiron apoio da Deputación en 2018

A Deputación da Coruña destina 1,3 millóns de euros a apoiar os clubs e entidades na promoción do deporte na provincia

A Deputación da Coruña convoca cinco programas de subvencións destinados a apoiar ás entidades e clubs deportivos da provincia. Cun orzamento global de 1,3 millóns de euros, as axudas teñen como obxectivo "a promoción da actividade deportiva en todos os seus ámbitos, dende o fomento do deporte base ao apoio a grandes eventos", segundo explicou o presidente da Deputación, Valentín González Formoso.
Formoso subliñou "o importante esforzo inversor" que realiza a Deputación en materia deportiva e sostivo que estas liñas de subvencións contribúen a manter a actividade e o funcionamento dos equipos coruñeses en competicións de todas as disciplinas e categorías deportivas, "recoñecendo o esforzo que fan cada día milleiros de deportistas para colocar aos clubs coruñeses na vangarda do deporte galego".


Apoiar os clubs en competicións oficiais

As bases dos diferentes programas veñen de ser publicadas no BOP do 13 de febreiro e recollen cinco modalidades diferentes de subvencións.
Dous dos programas están dirixidos a clubs deportivos da provincia da Coruña que participen en competicións federadas de ámbito local, provincial ou autonómico (150.000 euros) ou nacional e internacional (447.000 euros).
No caso dos clubs que compiten a nivel local, provincial e autonómico as axudas oscilarán entre os 5.000 e os 75.000 euros que se poderán destinar a cuestións como a adquisición de material deportivo non inventariable, aloxamento, seguros, soldos e salarios do persoal deportivo, cotas a entidades ou gastos de participación en competicións oficiais. Para os clubs federados que compiten a nivel nacional ou internacional estas axudas poden chegar ata os 200.000 euros.

Infraestruturas, equipamento e actividades

A Deputación convoca tamén un programa de axudas dotado cun orzamento de 400.000 euros e destinado ás entidades deportivas da provincia para mellorar as súas infraestruturas e equipamento durante o ano 2019. As entidades poderán solicitar así subvencións da institución provincial para a adquisición, rehabilitación ou mellora de instalacións, obra nova, bens inventariables como maquinaria, equipos informáticos ou medios de transporte, entre outras. Nesta liña, as achegas da Deputación oscilarán entre os 1.000 € e os 40.000 euros.
Tamén se dota con 150.000 euros a liña de actividades deportivas de entidades que teñan como finalidade mellorar a condición física, a ocupación activa do tempo de lecer, o deporte afeccionado ou popular, a promoción social dos valores deportivos, ou a organización de actividades de formación. Neste caso as axudas poden ir desde 1.000 a 30.000 euros.

Grandes eventos deportivos

A área de Deportes reserva tamén 150.000 euros para unha liña de subvencións destinada a apoiar ás entidades sen ánimo de lucro da provincia na organización e desenvolvemento de grandes eventos deportivos, singulares ou de especial interese pola súa incidencia en termos deportivos, sociais ou económicos para o territorio no que se celebran. O orzamento mínimo destes eventos para acceder ás axudas debe ser de 50.000 euros e a Deputación achegará subvencións de entre 6.000 e 70.000 euros, en función do orzamento.
Entre outras cuestións, as entidades organizadoras deben acreditar os recursos materiais e humanos necesarios para o desenvolvemento do evento, o número de deportistas participantes femininas, o seu ámbito (autonómico, nacional ou internacional), a inclusión ou non da proba no calendario oficial de competicións e o impacto deportivo, social ou económico previsto, número de edicións e o interesa da proposta.

Páxinas suxeridas