Estás en:Novas

A Deputación destina 30.000 euros para o mantemento da Unidade Asistencial de Drogodependencias de Carballo

A unidade, que presta servizo a todos os concellos da Costa da Morte, atendeu o ano pasado a 424 persoas e abriu 99 novas historias clínicas

A Deputación destina 30.000 euros para o mantemento da Unidade Asistencial de Drogodependencias de Carballo

A Deputación da Coruña contribuirá este ano con 30.000 euros ao mantemento da Unidade Asistencial de Drogodependencias (UAD) de Carballo.

Esta achega provincial articularase a través do convenio que hoxe asinaron, na sede da institución provincial, o presidente Valentín González Formoso e o alcalde de Carballo, Evencio Ferrero.

O presidente da Deputación subliñou que o convenio "contribúe a manter un centro que dá servizo a 15 concellos das comarcas de Bergantiños e Costa da Morte e que o ano pasado axudou a 424 persoas" a abandonar os hábitos tóxicos.

Pola súa banda, o alcalde de Carballo agradeceu a colaboración que desde hai moitos anos vén prestando a Deputación para o sostemento do centro.

Ademais de Carballo, a UAD dá servizo a Camariñas, Fisterra, Malpica, Cee, A Laracha, Muxía, Ponteceso, Coristanco, Laxe, Cabana, Vimianzo, Zas, Corcubión e Dumbría.

A Unidade Asistencial de Drogodependencias de Carballo ofrece servizos de tratamento e prevención de consumo de drogas e alcohol, programa de incorporación social personalizada, actividades de investigación, docencia e coordinación con outros servizos sanitarios e sociais coma centros de saúde, centros penitenciarios ou servizo de Psiquiatría do CHUAC.

No seu cadro de persoal conta con médico, enfermeira, psicóloga, traballadora social e persoal administrativo para prestar unha atención integral aos usuarios e usuarias, tanto no eido médico coma no psicolóxico e social.

Páxinas suxeridas