Estás en:Novas

Institutos de secundaria da Coruña, Betanzos, Cerceda e As Pontes participarán nunha nova edición do proxecto de emprendemento escolar impulsado pola Deputación da Coruña

Os IES A Sardiñeira da Coruña, As Mariñas de Betanzos e Moncho Valcarce das Pontes e o CPI O Cruce de Cerceda participarán neste programa co asesoramento de distintas entidades empresariais da provincia

González Formoso destaca que o obxectivo do programa PROEM "é potenciar a cultura emprendedora entre a mocidade"

Institutos de secundaria da Coruña, Betanzos, Cerceda e As Pontes participarán nunha nova edición do proxecto de emprendemento escolar impulsado pola Deputación da Coruña

O presidente da Deputación da Coruña, Valentín González Formoso, e o seu homólogo da Asociación de Empresarios SEARA, José Castro Romero, asinaron na sede da institución provincial o convenio de colaboración para impulsar unha nova edición programa PROEM de Emprendemento na Escola, promovido durante os últimos anos ao abeiro do do PEL (Plan de emprego local).

O proxecto conta coa implicación de distintos centros educativos e entidades empresariais e pretende promover o emprendemento desde a escola como motor de innovación, competitividade e crecemento económico da provincia da Coruña.

Alumnas e alumnos de 3º e 4º de ESO dos IES A Sardiñeira da Coruña (coa colaboración da Asociación de Empresarios de Agrela), IES As Mariñas de Betanzos (coa colaboración dos empresarios de Bergondo), IES Moncho Valcarce das Pontes (coa colaboración da Asociación empresarial SEARA) e o CPI O Cruce de Cerceda (coa colaboración da Asociación de Empresarios do Polígono de Sabón) participarán de novo neste programa, que ten como obxectivo "potenciar a cultura emprendedora entre a mocidade, dándolles a oportunidade de aprender a pór en marcha e xestionar unha idea de negocio desde o seu inicio", segundo explicou o presidente da institución provincial, Valentín González Formoso.

A metodoloxía é a de crear unha cooperativa educativa co alumnado de secundaria para que teñan a experiencia completa de crear, xestionar e desenvolver un proxecto empresarial real, o que lles permite a mozos e mozas adquirir determinadas competencias e coñecementos que lles poden ser de grande utilidade no futuro.

González Formoso destacou "o talento emprendedor" acreditado polos mozos e mozas nas últimas edicións do programa e agradeceu a implicación tanto das entidades empresariais que supervisan os proxectos e forman as mozas e mozos coma do profesorado dos centros escolares, que contribúen ao seu éxito.

O proxecto PROEM de emprendemento na escola naceu nas Pontes, cunha colaboración entre o IES Moncho Valcarce e a Asociación de Empresarios SEARA, e estendeuse a outros centros escolares da provincia grazas ao apoio do PEL, o programa estratéxico da Deputación para a promoción do emprego e o emprendemento na provincia. Tras o éxito acadado cos primeiros proxectos, o goberno provincial estuda a súa extensión  a outros centros escolares da provincia.

Páxinas suxeridas