Estás en:Novas

A Deputación completa os trámites de expropiación para as obras da segunda fase da Travesía de Serantes, en Ferrol

Cita os propietarios dos terreos afectados o día 23 de xullo para o pago dos depósitos previos

A Deputación da Coruña destina 226.925 euros á adquisición destes terreos

As obras suporán un importante investimento 636.110 de euros para continuar o proxecto da primeira fase, ampliando a estrada e dotando a zona de beirarrúas

A Deputación completa os trámites de expropiación para as obras da segunda fase da Travesía de Serantes, en Ferrol

O Boletín Oficial da Provincia vén de publicar o anuncio do pago dos depósitos previos correspondentes ás expropiacións dos 66 predios necesarios para acometer a segunda fase das obras da travesía da estrada DP 3612 de Aneiros-Cabana a Ferrol.

A Deputación da Coruña destina 226.925,98 euros euros á adquisición destes terreos, que se suman ao orzamento de 636.110,84 euros cos que contan as obras, co que o investimento total superará 863.000 euros.

Os veciños e veciñas propietarios dos terreos están citados o día 23 de xullo, de 16 a 20 horas, na sede da Asociación de Veciños de Serantes.

As obras darán continuidade ás realizadas nos primeiros 300 metros da travesía de Serantes. Desenvolveranse entre os puntos quilométricos 0+300 e 1+100 e incluirán a ampliación da calzada ata os 7 metros de ancho con beiravías de 0,5 metros e creación de beirarrúas que contribuirán a mellorar a seguridade peonil nunha zona que rexistra un intenso tráfico de vehículos.

O proxecto inclúe tamén a renovación dos servizos afectados (rede de saneamento e abastecemento de auga) e a instalación de nova iluminación con luminarias LED, en lugar das actuais lámpadas de vapor de sodio.

Páxinas suxeridas