Estás en:Novas

González Formoso apoia as reclamacións dos traballadores de Siemens-Gamesa nas Somozas

O Goberno provincial levará ao pleno da Deputación unha moción de apoio aos traballadores instando á Xunta a implicarse para garantir a viabilidade da empresa

González Formoso apoia as reclamacións dos traballadores de Siemens-Gamesa nas Somozas

O presidente da Deputación da Coruña, Valentín González Formoso, e o portavoz do Goberno provincial, Bernardo Fernández, recibiron hoxe na institución provincial aos representantes do comité de empresa de Siemens-Gamesa nas Somozas para analizar a situación actual na que está a factoría, que dá emprego a unhas 300 persoas.

Os representantes dos traballadores  Sergio López, Fidel Vilaboy, Alejandro Del Río e Carlos González explicaron que a planta das Somozas tiña ata agora unha importante carga de pedidos no mercado nacional, no norte de Portugal e no sur de Europa e trasladaron ao presidente a súa preocupación pola paulatina deslocalización da carga de traballo da empresa, especialmente cara a fábrica de palas de Vagos, en Portugal. Ademais alertaron de que de non producirse investimentos nas instalación das Somozas para poder construír novos modelos de palas, a factoría corre o risco de quedar fóra do mercado, segundo explicou o presidente do comité de empresa, Sergio López.

González Formoso manifestou o seu apoio ás reivindicacións dos traballadores "para evitar outra deslocalización e poder manter centos de postos de traballo nunha comarca xa de por si seriamente castigada polo desemprego".

Ademais, o presidente anunciou que o Goberno provincial, integrado por PSOE e BNG, levará ao vindeiro pleno da Deputación unha moción de apoio aos traballadores, instando á Xunta de Galicia e ao Goberno do Estado a "implicarse para garantir a viabilidade da planta de Siemens-Gamesa nas Somozas, aproveitando as oportunidades que ofrecen os plans de transición enerxética da Unión Europea".