Estás en:Novas

A Deputación da Coruña percorre os 956 km de costa na súa campaña de promoción turística

Móstranse desde o aire as praias, as poboacións e as paisaxes desde Ortegal a Rianxo

A Deputación da Coruña percorre os 956 km de costa na súa campaña de promoción turística

A área de Turismo da Deputación da Coruña percorre a través dunha serie de seis vídeos os 956 km de costa da provincia, dentro da súa campaña de promoción turística. O obxectivo é difundir un dos principais recursos da provincia con imaxes do litoral desde Ortegal até Rianxo.

Dando corpo ao lema da campaña de promoción turística da Deputación da Coruña "956 km de costa e un camiño infinito dan para moito", a área de Turismo difunde seis vídeos promocionais que fan un completo percorrido polo litoral da provincia desde o aire, con especial fincapé nas principais praias da costa e a paisaxe sobrecolledora dos cantís, pasando pola beleza dalgúns portos mariñeiros.

"De Ortegal a Mugardos" , "Do Barqueiro a Cariño", "De Ferrol a Malpica", "De Malpica a Fisterra" , "De Fisterra a Portosín" e "De Portosín a Rianxo" son as seis etapas deste programa audiovisual que mostra a costa da Coruña como un dos seus principais recursos de atracción turística do territorio e un dos atractivos singulares para a remontada do sector.

Os vídeos distribúense nas redes sociais da área de Turismo e as xerais da Deputación da Coruña e están accesíbeis tamén na páxina web institucional.

As imaxes arrancan co litoral do proxecto do xeoparque Cabo Ortegal que visita, ademais do propio cabo, os Cantís de Herbeira, Santo Andrés de Teixido, Punta Candieira, Cedeira, Punta Frouxeira, Cabo Prior, Ría de Ferrol e Mugardos na primeira das etapas para seguir, na segunda, no Barqueiro, Estaca de Bares, Loiba, Ortigueira e Cariño. A Ría de Ferrol, Ares, Lorbé, A Marola, A Coruña, Praia de Barrañán, Caión, Baldaio, Razo, Malpica continúan a produción que mostra a espectacular costa da Coruña, un dos seus principais atractivos dos xeodestinos turísticos da Coruña.

Desde Malpica a Cabo Fisterra, pasando por Praia de Seaia, Santo Adrián do Mar, Illas Sisargas, Punta Nariga, O Roncudo, Corme, Esteiro do Río Anllóns, Laxe, Praia de Soesto,Traba, Camelle, Praia do Trece, Monte Branco, Cemiterio dos Ingleses, Cabo Vilán, Camariñas, Punta da Barca, Cabo Touriñán e Nemiña son as imaxes que se inclúen no cuarto dos vídeos que se adentra na Costa da Morte, territorio que se completará no quinto audiovisual con imaxes de Fisterra, Castelo de Cardeal, Corcubión, Caneliñas, Monte Pindo, O Ézaro, Illas Lobeiras, Praia de Carnota, Punta Lariño, Monte Louro, Muros, Illa da Creba, Ponte Nafonso, Ría de Noia, Portosín, e as Illas Lobeiras.

Finalmente, o ciclo péchase en Rianxo, despois de pasar Portosín, Porto do Son, Castro de Baroña, Praia das Furnas, Corrubedo, Aguiño, Miradoiro da Pedra da Ra, Ribeira, Illa de Sálvora, Illa da Rúa, Pobra do Caramiñal e Boiro.

Páxinas suxeridas