Estás en:Novas

A Deputación financiará o proxecto para a transformación da Lonxa Vella de Camariñas no Museo dos Naufraxios

O Concello contará co apoio da Deputación para converter o edificio nun espazo expositivo que tamén albergará conferencias ou cursos formativos

Valentín González Formoso e Sandra Insua reuníronse hoxe para tratar diferentes temas de interese para o municipio, como a construción das beirarrúas en Camelle de Arriba e a subvención para a Mostra do Encaixe

A Deputación financiará o proxecto para a transformación da Lonxa Vella de Camariñas no Museo dos Naufraxios

FOTO (ARQUIVO). Reunión do presidente da Deputación coa alcaldesa de Camariñas, Sandra Insua

A Deputación da Coruña comprometeuse a financiar o proxecto do Concello de Camariñas para a transformación do antigo edificio da Lonxa Vella, que actualmente está baleiro e en estado ruinoso, no Museo dos Naufraxios.

O presidente da Deputación, Valentín González Formoso, reuniuse hoxe coa alcaldesa de Camariñas, Sandra Insua, para concretar a apoio da institución provincial a este ambicioso proxecto, que permitirá transformar o inmoble nun espazo expositivo de referencia para a comarca da Costa da Morte.

No encontro, no que tamén estiveron presentes os concelleiros e concelleiras Encarna Liñeiro, Sergio Caamaño e Begoña Tajes, González Formoso interesouse polos detalles do proxecto, que tamén contará cunha zona destinada a albergar conferencias ou cursos formativos dirixidos aos traballadores e traballadoras do sector do mar.

Valentín Gonzalez Formoso destacou que "o edificio está nunha localización estratéxica e forma parte da historia recente do sector pesqueiro de Camariñas" e lembrou que "a comarca da Costa da Morte en particular e a provincia en xeral necesitan deste tipo de espazos para poñer en valor o enorme patrimonio que agocha a nosa costa".

Sandra Insua agradeceu o apoio da Deputación "xa que, despois de que conseguiramos a cesión do edificio da Lonxa Vella, o financiamento é imprescindible para poder acometer este proxecto para darlle utilidade e poñer en valor parte da historia de Camariñas, que estea en bo estado e que volva ser útil".

Outros temas

Na reunión tamén se avanzaron outros asuntos de interese para o municipio como a construción das beirarrúas de Camelle de Arriba, que se incluirán no Plan de Vías e Obras que se aprobará no pleno da Deputación deste mes de maio, e a subvención para a Mostra do Encaixe que se concretará como é habitual no mes de outubro.

Páxinas suxeridas