Estás en:Novas

A Deputación da Coruña anima a cantar no inicio do curso escolar

O día 19 de outubro remata o prazo para se presentar ao concurso Quero Cantar

A Deputación da Coruña anima a cantar no inicio do curso escolar

O 19 de outubro remata o prazo para presentar cancións ao III Certame de música infantil e xuvenil Quero Cantar e a Deputación da Coruña, organizadora do premio, anima a comezar o curso cantando. As bases poden consultarse na páxina www.querocantar.gal.

A edición dun disco colectivo; a actuación en directo no teatro Colón da Coruña; a gravación dun videoclip e cantidades económicas de 1500 €, 1000 € e 500 € son algúns dos premios do concurso Quero Cantar que ten a súa convocatoria aberta a grupos e solistas, con tres premios en cada unha das categorías infantil e xuvenil.

Un xurado composto por cinco recoñecidos profesionais da música terá que decidir as bandas que se inclúen no disco Quero Cantar ´18 de entre todos os que se presenten antes do vindeiro día 19 de outubro. De entre estas, as tres primeiras clasificadas en ambas as categorías han actuar na gala final do teatro Colón, que este ano se vai celebrar o sábado 17 de novembro.

A responsable provincial de Cultura, Goretti Sanmartín, fai un chamamento ás familias e ao profesorado para que anime a rapazada a participar, sempre co obxectivo de aprender e gozar "claro que gusta facer un bo papel, pero na realidade nós estamos convencidas de que, máis aló dos galardóns, o principal proveito que obtén a rapazada é a experiencia que adquire durante o proceso creativo e tamén a participación en todas as fases do concurso, de maneira especial na gala do Teatro Colón".

Grupos como Os nenos da Vella ou Máis boas cás patacas -gañadores da anterior edición- están a promover o concurso con mensaxes que explican o que supuxo a participación no Quero Cantar. "A pasada edición acadou especial repercusión tamén polo contido das cancións gañadoras, o "Quero xogar" de Os nenos da Vella da Coruña que reivindicaba "abandonar" as máquinas para se atopar con nenos e nenas nas rúas e prazas e o "Son muller" das Máis boas cás patacas, o tema que reivindicaba os dereitos das mulleres co que a banda de mozas de Teo revolucionaron o concurso", sinala Goretti Sanmartín.

"Cada vez que chega unha nova proposta o primeiro que lles preguntamos, normalmente ás persoas adultas que colaboran ou actúan como representantes, é como consideran que influíu nas rapazas e rapaces o concurso; a resposta maioritaria é que os encheu de ilusión e que fixo que se esforzasen máis aínda e con máis gusto na súa formación musical. Velaí o auténtico obxectivo do certame", sinala Tono Formoso, o coordinador do único certame para cancións en galego interpretadas por bandas infantís e xuvenís que chega agora á terceira edición.

Páxinas suxeridas