A Deputación destina 102.000 euros para financiar a reurbanización das rúas Ramón Noguera e Irmáns Fernández, en Camariñas
Valentín González Formoso e Sandra Insua asinaron o convenio para levar a cabo o proxecto, que inclúe a pavimentación das vías, a execución dunha rede de saneamento e outra de pluviais e a ordenación das rúas coa avenida da Coruña
A Deputación da Coruña financiará as obras de reurbanización das céntricas rúas Ramón Noguera e Irmáns Fernández, no Concello de Camariñas, un proxecto para o que achegará un total de 102.676,82 euros.
O presidente da Deputación, Valentín González Formoso, e a alcaldesa de Camariñas, Sandra Insua, asinaron o convenio de colaboración entre ambas as entidades polo que a Deputación achegará 102.676,82 euros, o 80% do orzamento total da obra, que ascende a 128.346,03 euros.
A actuación centrarase na pavimentación das rúas citadas. Para isto, aplicarase un novo firme de formigón armado na rúa Ramón Noguera e de aglomerado asfáltico en Irmáns Fernández, material que tamén se usará para o entronque coa Avenida da Coruña.
Previamente á pavimentación procederase á execución dunha rede de saneamento de augas fecais con bombeo co obxectivo de canalizalas á rede xeral que conduce á estación depuradora e evitando así que se produzan vertidos ao mar. Paralelamente, instalarase outra rede para a recollida e evacuación de augas pluviais.
Finalmente, procederase á ordenación do encontro destas dúas rúas coa Avenida da Coruña. Para facilitar a mobilidade habilitarase un paso peonil de pedra granítica que conectará a Avenida da Coruña coas rúas a través da illa existente, na que se renovará a zona verde, instalarase unha luminaria e tamén unha baranda. Ademais, reordenaranse as prazas de aparcadoiro en toda a zona.
