A Deputación impulsará a mellora da céntrica rúa Cristóbal Colón en Ribeira
O vicepresidente, Xosé Regueira, visitou esta mañá o municipio, acompañado do alcalde, Luís Pérez Barral, onde se reuniron para abordar diferentes proxectos de cooperación entre ambas institucións
Ademais da mellora da accesibilidade na rúa Cristóbal Colón, a Deputación cederá ao Concello un tractor para facilitar os labores de limpeza, especialmente nas zonas rurais
O vicepresidente da Deputación, Xosé Regueira, visitou esta mañá o concello Ribeira, onde se reuniu co alcalde, Luís Pérez Barral, e parte da corporación municipal, para abordar diferentes proxectos que contarán co apoio da entidade provincial. Un deles é a mellora da accesibilidade na rúa Cristóbal Colón, entre a rúa Lugo e a rúa Eduardo Pondal e, o outro, a cesión dun tractor por parte da Deputación para facilitar os labores de limpeza no concello, especialmente nas zonas rurais.
Regueira salientou que, durante a reunión, se abordaron temas importantes para o Concello de Ribeira "dos cales tomamos boa nota para tratar de resolvelos canto antes". Ademais do convenio para a mellora da rúa Cristóbal Colón, tratouse a cuestión do turismo, "foi unha boa tempada para o Concello pero tamén hai retos que temos en toda a provincia como é o do autocaravanismo. Neste sentido, dende a Deputación estamos traballando nun programa piloto que aporte solucións". O vicepresidente apuntou tamén que "falamos moito de estradas, e tamén de futuro. Vemos con preocupación o que está pasando nos nosos montes, e por iso estamos estudando a maneira de impactar dun xeito positivo nos servizos de prevención".
Pola súa banda, o alcalde agradeceu "a boa disposición do vicepresidente para axilizar o convenio que permita a renovación integral dunha rúa moi céntrica que precisa unha intervención forte". Tamén se referiu á petición "para mellorar o mantemento das parroquias, pois o noso servizo de rozas precisa dun novo tractor" e ao estado das estradas provinciais, "é moi necesario un proxecto para mellorar a súa seguridade viaria". Pérez Barral salientou "a unión entre ambas institucións", que "permite mellorar a vida da veciñanza e a calidade dos servizos públicos do concello de Ribeira, polo que queremos agradecer o compromiso da Deputación con Ribeira e cos veciños e veciñas do rural".
O convenio entre Deputación e Concello para a obra da rúa Cristóbal Colón facilitará esta actuación nos prazos previstos, en beneficio da calidade de vida da veciñanza, consolidando así a boa cooperación entre o Concello de Ribeira e a Deputación da Coruña.
