O deputado de patrimonio, Xosé Penas, inaugura, en Arzúa, a exposición "50 anos coidando a terra" de ADEGA
A Asociación para a Defensa Ecolóxica de Galiza (ADEGA) organiza esta exposición exterior que poderá visitarse na Praza da Vila até o 9 de setembro
"Unha mostra que sirve para reivindicar a loita social, medioambiental, mais ao mesmo tempo diría que polo que é a idea de país que sempre fixo ADEGA como faro ao que seguimos dende hai 50 anos en todas as loitas canto houberon. E inaugurámola hoxe cando aínda queima parte do noso territorio", sinalou o deputado durante a súa intervención
Arzúa acolle dende hoxe a exposición "50 anos coidando a terra", coa que a asociación ecoloxista ADEGA conmemora medio século de traballo en defensa do medio ambiente galego, onde permanecerá até o 9 de setembro. O deputado de patrimonio, Xosé Penas, participou na inauguración, acompañado do alcalde de Arzúa, Xoán Xesús Carril, e representantes das plataformas veciñais Ulloa Viva e Mina de Touro-O Pino Non, como referentes actuais da loita ecoloxista na comarca da Ulloa.
A mostra itinerante, que conta co apoio da Deputación da Coruña, repasa, por medio de relatos e imaxes históricas, algúns dos fitos e mobilizacións ecoloxistas que máis pegada deixaron no país e que influíron de maneira máis acusada no presente e no noso devir futuro. "Unha mostra que sirve para reivindicar a loita social, medioambiental, mais ao mesmo tempo diría que polo que é a idea de país que sempre fixo ADEGA como faro ao que seguimos dende hai 50 anos en todas as loitas canto houberon. E inaugurámola hoxe cando aínda queima parte do noso territorio", sinalou o deputado. "Porque, como responsable de patrimonio, non se me ocorre patrimonio maior a defender que o noso medio ambiente".
"O noso patrimonio natural é o refuxio de milleiros de especies, é a historia viva dun territorio milenario, é unha forma de vivir e entender o mundo, dende o pequeno ata o global, é todo o que somos, e polo tanto temos esa obriga innegociable de facer que transcenda a nós e deixalo moito mellor do que o atopamos. Esa función cada vez máis urxente é a que leva 50 anos xa facendo unha entidade como ADEGA, unha entidade referente á que sen dúbida debemos acompañar" engadiu Penas.
A chegada desta exposición a Arzúa quere poñer en valor a resiliencia que teñen demostrado a comarca da Ulloa e as súas poboacións fronte a numerosos episodios de espolio enerxético, mineiro e forestal do noso territorio ao longo destes 50 anos. As persoas que visiten a exposición conmemorativa de ADEGA na Praza da Vila de Arzúa poderán ademais contemplar máis dun cento de logros na defensa da terra acadados nos últimos 50 anos, demostrando con "ese incansable traballo" que "diante do negro sempre vai estar o verde, diante da intolerancia e a depredación sempre vai estar a defensa e o amor polo territorio. que en definitiva é do que fala esta exposición. Dun amor incondicional por todo aquelo que forma parte de nós" apuntou o titular de patrimonio.
