Formoso recibe á nova reitora da USC, Rosa Crujeiras
Nunha reunión de traballo, os representantes de ambas institucións coincidiron en reforzar unha alianza estratéxica para a provincia
Dende a chegada á presidencia de Formoso, a aportación do ente provincial á universidade ronda os tres millóns de euros
Formoso e Crujeiras coincidiron en que unha das máximas da entidade académica debe ser a de garantir a igualdade de oportunidades
O presidente da Deputación da Coruña, Valentín González Formoso, mantivo hoxe un encontro institucional no pazo provincial coa nova reitora da Universidade de Santiago de Compostela, Rosa Crujeiras, no que supón a primeira visita oficial da máxima autoridade académica dende que asumiu o cargo.
Tras a reunión de traballo e en declaracións aos medios de comunicación, o mandatario provincial trasladou o profundo orgullo que supón para unha institución bicentenaria como a Deputación da Coruña acoller á representante dunha entidade "con cinco séculos de hitsoria e fundamental para o desenvolvemento de Galicia". Formoso quixo poñer en valor a transcendencia histórica do nomeamento de Crujeiras, destacando que é a primeira muller que asume unha responsabilidade de tan alta relevancia, encarnando de xeito exemplar a aspiración do país de "posuír un coñecemento democraticamente distribuído entre toda a cidadanía" como motor indispensable para o progreso colectivo.
O presidente lembrou que a relación bilateral entre o goberno provincial e a USC foi "historicamente moi produtiva", abranguendo actuacións transversais en todos os eidos que afectan de forma directa á sociedade coruñesa. Neste sentido, detallou que a cooperación esténdese "dende o ámbito científico, con proxectos que impactan positivamente dende o sector primario ata o sector tecnolóxico, ata o eido social, deportivo e cultural, incluíndo o financiamento de melloras substanciais nas infraestruturas da propia universidade". Formoso fixo especial fincapé en programas de estímulo do talento matemático como o proxecto ESTALMAT.
O investimento acumulado dende que se asumiu o actual goberno provincial achégase aos tres millóns de euros, unha cifra que, segundo avanzou, "seguirá aumentando progresivamente no futuro inmediato".
Pola súa banda, a reitora da Universidade de Santiago de Compostela amosou a súa fonda satisfacción por celebrar este encontro de traballo co presidente dunha administración que cualificou de "aliada estratéxica e esencial para proxectar o labor académico máis alá das nosas aulas". Crujeiras salientou que o apoio económico e loxístico da Deputación resulta "indispensable para a viabilidade de programas" de gran calado social como as iniciativas de extensión universitaria do cuarto ciclo a través da universidade de maiores, os plans específicos de captación de talento e as accións orientadas á transferencia efectiva de coñecemento cara ao tecido produtivo e social.
A reitora subliñou que as universidades públicas teñen a "misión de contribuír activamente á construción dunha sociedade moito máis crítica, informada e cohesionada", e fixo un chamamento á loita conxunta polas garantías sociais nun momento complexo no que a contorna universitaria "aínda non reflicte con total fidelidade a diversidade e a realidade demográfica da nosa sociedade".
Finalmente, ambos os dous mandatarios coincidiron na necesidade de intensificar as ferramentas de colaboración institucional para que a universidade se converta nun espazo de equidade absoluta onde calquera persoa poida acceder ás mesmas oportunidades con independencia do seu punto de partida socioeconómico.
