Estás en:Novas

A Deputación abre o prazo para que 500 nenos e nenas da provincia se anoten aos campamentos deportivos

A proposta está dirixida á mocidade de entre 9 e 14 anos de idade e desenvolveranse durante o mes de xuño e xullo no IES Rosalía Mera da Deputación, na cidade da Coruña

As inscricións estarán abertas ata o 20 de maio

A Deputación abre o prazo para que 500 nenos e nenas da provincia se anoten aos campamentos deportivos

A Deputación da Coruña abre o prazo para que 500 rapaces e rapazas da provincia se apunten aos campamentos deportivos que a institución vai levar a cabo nos meses de xuño e xullo. As inscricións poderán realizarse ata o 20 de maio.

Os campamentos están destinados a nenos e nenas de entre 9 e 14 anos de idade e desenvolveranse no IES Rosalía Mera da Deputación, situado na cidade da Coruña, en cinco quendas de seis días de duración. O prezo do campamento é de 85 euros, que inclúe transporte, estadía e manutención, así coma o gasto das actividades.

A deputada de Deportes, Cristina Capelán, celebrou "a boa acollida que teñen estes campamentos entre a mocidade dos 93 concellos da provincia, tanto é así, que incrementamos o número de prazas, pasando das 400 da anterior edición ás 500 desta".

Capelán tamén definiu a iniciativa "como una proposta lúdico deportiva moi completa para que todos os nenos e nenas poidan gozar dun verán de actividades, aprendizaxe e compartan vivencias con novos compañeiros e compañeiras".

Durante as xornadas de campamento, a rapazada participante poderá gozar de deportes náuticos, actividades ao aire libre, excursións á praia e visitas culturais, deportivas e etnográficas en zonas de interese na provincia da Coruña. As actividades e xogos buscarán en todo momento fomentar a comunicación, o intercambio de experiencia, a convivencia e o respecto polos demais.

Entre o equipamento recomendado pola organización para a estadía dos rapaces figura roupa de rúa e deportiva, toallas e útiles de aseo, saco de durmir e lanterna, gafas de sol, crema protectora, chuvasqueiro e mochila.

As quendas son as seguintes:

1ª quenda (do 26 de xuño ao 2 de xullo): Aranga, Bergondo, Cabanas, Capela, Coirós, Culleredo, Curtis, Fene, Irixoa, Melide, Miño, Oza-Cesuras, Paderne, Pontedeume, As Pontes, Sada, Santiago, Vilarmaior e Vilasantar.

2ª quenda (do 3 ao 8 de xullo): Abegondo, Ames, Arzúa, A Baña, Boimorto, Boqueixón, Cerceda, Frades, Mesía, Negreira, Ordes, Oroso, O Pino, Rois, Santiso, Sobrado, Teo, Toques, Tordoia, Touro, Trazo, Val do Dubra e Vedra.

3ª quenda (do 10 ao 15 de xullo): Arteixo, Betanzos, Cabana de Bergantiños, Cambre, Carballo, Carral, Coristanco, A Laracha, Laxe, Malpica, Mazaricos, Mugardos, Oleiros, Ponteceso e Santa Comba.

4ª quenda (do 17 ao 22 de xullo): Ares, Cariño, Cedeira, Cerdido, A Coruña, Ferrol, Mañón, Moeche, Narón, Neda, Ortigueira, San Sadurniño, As Somozas e Valdoviño.

5ª quenda (do 24 ao 29 de xullo): Boiro, Brión, Camariñas, Carnota, Cee, Corcubión, Dodro, Dumbría, Fisterra, Lousame, Muros, Muxía, Noia, Outes, Padrón, A Pobra do Caramiñal, Porto do Son, Rianxo, Ribeira, Vimianzo e Zas.