Estás en:Novas

Cultura da Deputación programa un ciclo de concertos pala celebrar o centenario do nacemento de Carlos López García-Picos

O Pazo de Mariñán acollerá o 29 de abril o primeiro recital, ao que lle seguirán, xa en maio, os das Pontes, os días 7 e 14; Rianxo, o 20 e 21; e Betanzos, o 27 e o 28

Cultura da Deputación programa un ciclo de concertos pala celebrar o centenario do nacemento de Carlos López García-Picos

Co gallo do nacemento do compositor Carlos García López-Picos (Betanzos, 1922–Oleiros, 2009), o departamento de Cultura da Deputación da Coruña programa un ciclo de concertos que arrancará o 29 de abril no Pazo de Mariñán e que se completará durante o mes de maio noutros tres escenarios: o salón de actos da Casa Dopeso das Pontes, os días 7 e 14; o Auditorio Municipal de Rianxo, o 20 e 21; e a Aula de Cultura Xulio Cuns de Betanzos, o 27 e o 28.

A primeira cita será un recital de obras para piano de compositores galegos interpretadas por Julio Mourenza Torreiro e por Jorge Briones Martínez, a quen acompañará en Mariñán (20.30 horas) a voz do poeta Miguel Anxo Fernán-Vello, condutor tamén da velada. O programa compóñeno as pezas 14 estruturas para piano A.35, de García-Picos; Movemento para piano, de Manuel Iglesias; Sonata veneciana, de Juan Durán; Campás melidenses, de Fernando V. Arias; En-re-do, de Margarita Viso; Atlante Op.5, de Paulino Pereiro; e Cunha esquezida mistura de espellos, de Manuel Balboa. A entrada para este concerto é de balde ata completar aforo.

Os outros concertos do ciclo están estruturados en dous recitais. Nos primeiros (7 de maio en As Pontes, as 12 horas; 20 de maio en Rianxo, ás 21; e 28 de maio en Betanzos, ás 20.30), para violonchelo e piano, os instrumentos a solo para os que máis partituras compuxo García-Picos, a violenchelista Teresa Morales Diego e o pianista Javier Ares Espiño interpretarán partituras de Manuel de Falla, García-Picos, Isidro B. Maiztegui e Astor Piazolla. Nos segundos (14 de maio en As Pontes, as 12 horas; 21 de maio en Rianxo, ás 21; e 27 de maio en Betanzos, ás 20.30), para voz e piano, a soprano Susana de Lorenzo e o pianista Alejo de Lorenzo ofrecerán a súa versión de obras de obras de Marcial del Adalid Gurrea, Eugenia Osterberger Luard, Andrés Gaos Berea, García-Picos e Juan Durán Alonso.

O compositor
Compositor e director de coros galego-arxentino, Carlos López García-Picos, desenvolveu gran parte da súa actividade en Bos Aires, onde contactou coa intelectualidade galeguista. Na súa formación destaca unha estancia de varios anos en Francia, onde estudou na Schola Cantorum e no Conservatorio Nacional de París. Foi o principal impulsor, socio e membro de honra da Asociación Galega de Compositores e mantivo na capital arxentina un compromiso constante coa comunidade galega, reflectida en moitos aspectos da súa obra.

A elección do Pazo de Mariñán como escenario do comezo do ciclo non é gratuíta. O 18 de abril de 1986 celebrouse no Pazo un concerto de especial relevancia na historia musical contemporánea da comunidade galega. O acto estivo organizado pola Deputación Provincial da Coruña e pola Agrupación Cultural O Facho, e o intérprete foi o pianista francés Jean Pierre Dupuy, quen deu vida a diversas partituras dunha xeración emerxente de músicos coruñeses. No programa figuraron obras dos compositores Juan Durán, Fernando V. Arias, Margarita Viso, Paulino Pereiro, Manuel Iglesias, Manuel Balboa e o propio García-Picos. Daquela tamén exerceu de presentador, e de importante promotor do recital, Miguel Anxo Fernán-Vello.

Páxinas suxeridas