Cristina Capelán destaca a aposta e o compromiso da Deputación coa educación ambiental nas xornadas organizada polo CEIDA
O programa desta xornada incluía unha charla sobre Soberanía alimentaria, outra sobre o Plan Alimentario da Reserva e unha mesa redonda sobre o programa educativo "Consume de maneira sostible: defende a soberanía alimentaria"
A deputada provincial de Mar, Agro e Medio Rural, Cristina Capelán, participou na Xornada de Soberanía Alimentaria de alimentación saudable e sostible organizada polo CEIDA.
Capelán destacou na súa intervención a "aposta e o compromiso da Deputación coa educación e concienciación ambiental a través de programas como 'Para unha transición ecolóxica', que ten a intención de achegar aos mozos e mozas a sensibilización á hora de coidar a nosa contorna".
"Para unha transición ecolóxica" é un programa de capacitación, educación, divulgación e participación ambiental, que abarca distintas actividades e ten por obxectivo fomentar actitudes participativas, invitar a colectivos a coñecer o patrimonio natural do Castelo de Santa Cruz e a súa contorna, descubrir as posibles potencialidades dun espazo protexido e proporcionar as ferramentas necesarias para comprender os valores culturais e naturais do litoral galego.
Durante a xornada celebrouse unha charla sobre Soberanía alimentaria e saúde, impartida por Ángeles Romero, catedrática de Tecnoloxía de Alimentos da Universidade de Santiago de Compostela; e outra sobre o Plan alimentario da Reserva da Biosfera Mariñas Coruñesas e Terras do Mandeo, dirixida por Miguel Fernández Pardo, do equipo técnico da Reserva.
Ao remate levouse a cabo unha mesa redonda da presentación do programa educativo "Consume de maneira sostible: defende a soberanía alimentaria", moderada polo equipo de educación ambiental do CEIDA e na que participaron a Asociación Raíña Paraíso, de Vilasantar, Labrecos Sociedade Cooperativa Galega, de Oza-Cesuras, Os Biosbardos, de Cambre e Abeiro da Loba, de Sobrado.