A Deputación subvenciona con 509.000 euros os investimentos culturais das entidades sen fins de lucro en 2025
Os cen beneficiarios recibirán axudas de entre 3000 e 13 000 €
O Boletín Oficial da Provincia publica hoxe a concesión definitiva do programa FO204, de subvencións a entidades sen fins de lucro para a realización de investimentos culturais durante o ano 2025. A administración provincial inviste 508.935 euros, repartidos entre cen beneficiarios, que recibirán axudas de entre 3.000 e 13.000 euros.
As subvencións distribúense así:
61 entidades que desenvolven a súa actividade ordinaria na provincia da Coruña: 317 449 €.
5 entidades que desenvolven a súa actividade ordinaria tanto dentro como fóra da provincia da Coruña: 21 441 €.
8 entidades veciñais e de tempo libre: 33 290 €.
9 entidades socioeducativas: 36 472 €.
4 entidades representativas dos diferentes sectores profesionais e amadores da cultura galega: 16 444 €.
13 fundacións e entidades titulares de museos, centros de interpretación ou bibliotecas: 83 836 €.
«Na área de Cultura da Deputación», sinalou a titular do departamento, Natividade González, cremos firmemente que investir en cultura é investir no benestar da nosa sociedade. É investir en coñecemento, en creatividade, en cohesión social e en oportunidades. Por iso, seguiremos traballando para facilitar os recursos necesarios que permitan ás nosas entidades culturais seguir medrando e desenvolvendo todo o seu potencial».
A relación de beneficiarios pode consultarse no BOP do 31 de xullo.