A Deputación estará un ano máis no Festival da Luz con showcookings, mercado e escenario propios
Dentro do mercado, no que participarán numerosos produtores e artesáns, haberá un espazo para showcookings ao cargo de André Arzúa, cociñeiro de Espazo Abella
No escenario estenderase unha completa programación de actuacións pensadas para todos os públicos
A Deputación da Coruña reforza a súa aposta pola promoción da cultura e dos produtos locais coa súa participación, un ano máis, no Festival da Luz, que se celebra esta fin de semana en Boimorto. A entidade provincial contará cun espazo propio no que se inclúen un mercado con artesáns e produtores locais, showcookings en directo e un escenario con actuacións para todos os públicos.
Showcookings con André Arzúa
Dentro do espazo do mercado, a Deputación habilitará unha zona gastronómica para os showcookings, que estarán dirixidos por André Arzúa, chef de Espazo Abella, en Santiago de Compostela. Ofrecerá dúas demostracións culinarias, unha o sábado e outra o domingo.
O sábado elaborará bocados de 'roast beef' da IXP Ternera Gallega, un risotto de tomates negros de Santiago con papada curada de porco celta e unha empanada de millo de corvo con ventresca de bonito. O domingo preparará unha tarta de queixo DOP Arzúa-Ulloa con cumbre de cardamomo, un xamón de porco celta e un lingote de galiña piñeira co seu caldo.
Artesáns e produtores locais no Mercado
Durante estes dous días, o público tamén poderá visitar o Mercado da Deputación, no que participarán numerosos produtores agroalimentarios e artesáns da provincia.
Entre os artesáns estarán: Bo Peixe, Asociación de Redeiras Illa da Estrela, Na Mea Nani, Mundaya, Laura Triñares, A Castrexa, O Carabel Ecocestos, Silvereira, Jorge Eiroa García, Susana Anta, Jatafarta, D Rositas, Devalo, Comeluz, Noga Arts, Vacatola, Moira, Deica! Creacións, Amor ó teu, Pepiña medias longas e Carmela Mola.
No que respecta aos produtores, estarán presentes: A Conserveira, Bonilla a la Vista, Casa da Avoa, Cafés Lúa, Galmesán, Lodeiros, Pandejuevo, Xearte Brigitte, Celtagal, Bensenta.
Escenario con música e animación
A entidade provincial disporá tamén dun escenario propio cunha programación repleta de música e animación para todas as idades. O sábado, día 30, a banda Cuarta Xusta será a encargada de abrir a programación, á que se sumarán o músico multi-instrumentalista Pulpiño Viascón, o monólogo de Leti da Taberna, o grupo de pop-rock galego Los Limones, a banda Tregua e os Mártires do Rock & Roll.
O domingo, día 31, será a quenda do grupo Suzukiños, o monólogo de Carlos Blanco, a música da banda Broken Peach, Antía Muíño e Boyanka Kostova.
