A Vía Verde Compostela-Tambre-Lengüelle será unha realidade no verán de 2026
A Deputación e o Concello de Santiago asinaron hoxe un acordo de encomenda de xestión para realizar as obras do tramo que une o camiño das Pereiras e a localidade de Ramelle, no termo municipal compostelán.
Esta actuación está orzada en 833.391 euros, dos cales a institución provincial aporta case o 64%, isto é, máis de medio millón de euros.
O tramo inicial dende a estación da Sionlla está actualmente en execución, mentres que o treito entre Ramelle e a ponte sobre o río Tambre está a piques de ser adxudicado.
A Deputación da Coruña e o Concello de Santiago de Compostela asinaron hoxe un convenio de encomenda de execución da obra que completará os 36 quilómetros de senda da Vía Verde Compostela-Tambre-Lengüelle, que conecta de xeito peonil e ciclista a capital galega con Cerceda polo antigo trazado do ferrocarril entre A Coruña e Santiago.
O acordo, asinado hoxe polo presidente da Deputación, Valentín González Formoso, e a alcaldesa compostelá, Goretti Sanmartín, establece que a institución provincial execute as obras do segundo tramo deste itinerario, que van dende o camiño das Pereiras ata a localidade de Ramelle, todo dentro do termo municipal compostelán. A actuación, orzada en 833.391 euros — dos cales a Deputación aportará 531.539 — consiste esencialmente na adecuación do treito de case 5 quilómetros e a súa contorna para o seu uso como vía de mobilidade peonil e ciclista.
Este é un dos derradeiros pasos para completar os 36 quilómetros da Vía Verde, pois só faltan por completarse outros dous treitos, ambos no Concello de Santiago. O primeiro deles, entre a estación da Sionlla e o camiño das Pereiras (de aproximadamente 2,2 quilómetros) está actualmente en execución e o seu remate producirase a curto prazo tras un investimento de máis de 750.000 euros. O segundo atópase na fase final da adxudicación, polo que antes de rematar 2025 comezarán os traballos para adecuar os 3 quilómetros que unen Ramelle e a ponte sobre o río Tambre. Esta actuación supón un investimento de preto de 280.000 euros, financiados a través dos fondos Next Generation EU a través do Plan de Recuperación, Transformación e Resiliencia.
Deste xeito, os prazos que se manexan dende a Deputación prevén que esta senda estea completamente rematada no verán do 2026 tras un investimento nos últimos anos que supera os 1,8 millóns de euros. Unha vez rematada quedará cumprido o compromiso adquirido polo presidente provincial no 2022, na inauguración do tramo entre Cerceda e Oroso, que prometeu que esta Vía Verde sería recuperada na súa totalidade ata chegar a Santiago.
A maior Vía Verde de Galicia
Valentín González Formoso resaltou que "a Vía Verde Compostela-Tambre-Lengüelle é un proxecto estratéxico para a provincia, porque recupera o trazado histórico do ferrocarril e convérteo nun espazo de encontro, lecer e mobilidade sostible. Supón tamén unha aposta clara polo turismo de proximidade e pola dinamización económica dos concellos polos que discorre, que se verán beneficiados coa posta en marcha da que xa é a maior Vía Verde de Galicia".
Formoso engadiu que "a colaboración institucional foi clave para avanzar neste proxecto. Deputación e concellos fomos da man para que a Vía Verde sexa unha realidade en 2026. O investimento de preto de 2 millóns de euros é a mellor mostra do compromiso adquirido: devolverlle á cidadanía este corredor verde como un espazo seguro, accesible e pensado tanto para quen quere facer deporte como para quen busca un paseo tranquilo na natureza".
A alcaldesa de Santiago, Goretti Sanmartín destacou a coordinación entre as dúas administracións para impulsar este proxecto, que encaixa nos valores do Concello para promover unha mobilidade alternativa e sustentable, ao tempo que se impulsan hábitos de vida saludables a través do deporte e se recuperan zonas abandonadas.
A Vía Verde transcorre por unha das zonas do concello menos coñecidas, polo que tamén é unha oportunidade para promover o acceso a unha das paisaxes máis sobranceiras, xa que atravesa o río Tambre. A rexedora compostelá celebra que con esta vía tamén se abre unha actuación moi ben recibida pola veciñanza.
A Deputación incrementa o financiamento para o Auditorio de Galicia
Por outra banda, a Deputación da Coruña e o Concello de Santiago asinaron tamén un convenio de colaboración polo que a institución provincial concede unha subvención nominativa de ata 300.000 euros para o financiamento parcial da programación cultural do Auditorio de Galicia durante o ano 2025. Esta achega supón un incremento de 100.000 euros con respecto ao ano pasado e cubre un 79% do orzamento total previsto, que ascende a 379.065 euros, e permitirá desenvolver unha ampla oferta de actividades artísticas e musicais dirixidas a públicos diversos.
O programa cultural inclúe citas xa consolidadas como as distintas actividades encadradas na área Patrimonio C, as Xornadas de Ilustración Urbana, a programación de abono da Real Filharmonía de Galicia, o Ciclo de Lied ou o novo formato Contemporáneas, que traerá estreas de música actual. Tamén destacan o encontro Soundpainting Compostela, a gala aRi(t)mar, o Festival C de verán en espazos abertos, e unha completa programación de artes escénicas e do movemento que situará Santiago como referente estatal en espectáculos de grande e medio formato.
